A aula CeMIT de Compostela acolle os primeiros actos de celebración dos 25 anos da CRTVG
luns, 19 de abril do 2010
A aula CeMIT de
Santiago de Compostela, situada na Facultade de Ciencias da Comunicación, está dando
acollida, dende esta mesma mañá, a algunhas das actividades organizadas pola
Secretaría Xeral de Medios para celebrar os 25 anos da CRTVG.
De feito, dende
as 11:00 horas desta mañá, as persoas que se achegaron ata a devandita aula,
puideron presenciar a visita do mítico Santiago Pemán, o home do tempo da
galega, que fixo un percorrido sobre a súa traxectoria na TVG ao longo destes
25 anos de emisións.
A Secretaría Xeral de Medios e a Compañía
de Radio Televisión de Galicia celebran este aniversario co obxectivo común de “potenciar os avances tecnolóxicos cos que
ambos contan no ámbito das comunicacións”, xa que logo, a este acto hai que
engadirlle outras iniciativas TIC organizadas para conmemorar o 25º aniversario
do ente radiotelevisivo autonómico, que consisten en dous concursos
relacionados coas novas canles de comunicación (“As grandes frases da dobraxe da Galega” e “Que está a pasar nas aulas CeMIT con motivo dos 25 anos da CRTVG”),
cuxas bases de participación poden atoparse na páxina web da CRTVG así como na do Centro Multimedia de Galicia.
Cada un dos concursos contará con tres
gañadores e entre os premios destacan reprodutores blu-ray, discos duros
externos ou videocámaras dixitais.
Ademais da aula
da Rede CeMIT de Santiago, os actos conmemorativos dos 25 anos da CRTVG
desenvolveranse tamén nas aulas CeMIT da
Coruña, Lugo, Ourense, Pontevedra, Vigo e Ferrol.
Asemade, a exposición itinerante e
interactiva da Secretaría Xeral de Medios, Galiciadixital, acollerá tamén durante
todo o ano unha serie de contidos sobre a CRTVG. Dese xeito, os interesados
poderán converterse en presentadores dos informativos da Televisión de Galicia
por un día, a través do Plató Chroma Key, un espazo no que se poden situar e
aparecer reflectidos nunha pantalla TFT de gran formato, inmersos no decorado.
Ademais, a mostra acollerá unha exposición de obxectos relacionados coa radio e
coa televisión e un vídeo conmemorativo do aniversario, entre outros contidos.