A aposta firme polas TIC nas administracións acadaría un aforro público de 7.823 millóns
xoves, 12 de xullo do 2012
O sector das novas tecnoloxías, servizos e aparellos vén de presentar unha
proposta para abrir un camiño firme e mantíbel para acadar o arelado aforro que
nos permita comezar xa a saír da crise. Dáse a casualidade de que sería un
camiño que non implicaría subas inasumíbeis de impostos, recortes sociais nin
sufrimentos extra (por se houbese poucos xa a estas alturas da crise) para o
común da cidadanía. A iniciativa vén da comisión de Contratación Electrónica da
ANEI (Asociación Nacional de Empresas de Internet), e foi presentada, con corpo
de informe, este día 10 na CEOE en Madrid. Basicamente,
o que se propón é un aforro de 7.823 millóns de euros para España, cousa
que se acadaría “incorporando tecnoloxía
na xestión dos seus procedementos de contratación”.
Por contratación electrónica, explica a comisión, enténdese a substitución
dos procedementos baseados en soporte de papel polo uso das TIC ao longo de
toda a cadea de contratación pública.
A maiores, suporía a introdución de procesos electrónicos para sustentar as
distintas fases do proceso de contratación, é dicir, publicación dos anuncios
de licitación, subministro do prego de condicións, presentación de ofertas,
avaliación, adxudicación, pedido, facturación e pago. O informe en cuestión apóiase
en estudos da Unión Europea para estimar a cifra global de aforro que o sector
público pode acadar, e conclúe en propor aos poderes públicos deseñar e
aprobar, sen demora, un programa de uso de medios electrónicos na contratación
pública. Con todo, explica a comisión, non se trata só de pór en marcha
plataformas electrónicas de licitación, xa que gran parte dos ditos aforros
conséguense coa aplicación das novas tecnoloxías nos procesos internos de
adquisición para lograr unha administración pública máis eficaz.
Safwan Nassri, membro da comisión e director xeral de Pixelware, unha das
compañías que participaron na elaboración do estudo, salienta que “o novo texto refundido da lei de contratos
de novembro de 2011 fala ás claras da necesidade de mellorar a eficacia nos
procesos de contratación pública, máis polo miúdo no artigo 22 que fala da
axilización de trámites, a innovación e a incorporación de alta tecnoloxía como
aspectos positivos nos procesos de formalización da adquisición”.