A aplicación galega Park App seduce aos investidores europeos na feira Intertraffic de Amsterdam
venres, 2 de maio do 2014
Logo da
integración da ferramenta Park App en Vigo, temos que volver
falar desta aplicación galega aínda que dun xeito diferente e
ampliando os horizontes do contexto. De feito, segundo nos contan os
responsábeis deste recurso dirixido a facilitar aos condutores a
localización do aparcamento máis próximo coa axuda do seu
dispositivo, Park App
presentouse os días pasados (e con gran éxito) na feira
Intertraffic
de Amsterdam. No evento, amais de espertar a curiosidade dos
visitantes en xeral, “xerou interese entre profesionais do sector
para o seu proceso de internacionalización”.
Lembrar que Park App,
amais de facernos máis doado atopar a praza de aparcadoiro máis
próxima, achéganos información sobre prezos e realizar reservas de
espazos de aparcamento a través do móbil, incluíndo descontos. As
vantaxes da aplicación, nestes tempos que corren (con cada vez máis
dificultades para atopar prazas urbanas, co combustíbel subindo de
prezo cada pouco e cunha meirande concienciación entre os condutores
para contaminar menos circulando o mínimo imprescindíbel), son
grandes e están á vista, polo que o interese xerado na feira
holandesa (sendo Holanda un país pioneiro en mobilidade sustentábel)
era máis que previsíbel.
Segundo nos conta o
equipo formado por Raúl Conde (CEO de Park App), “foron varios
días intensos de traballo e presentacións” que semella que
conseguiron dar resultado. “De feito”, engaden, “conseguimos
namorar coa nosa proposta a máis de 70 posíbeis investidores e máis
de 130 responsábeis de aparcamentos que xa queren instalar a
tecnoloxía desenvolvida na cidade de Vigo”. Entre os interesados
atópanse investidores de países como os EEUU, Alemaña, Francia,
Holanda ou Noruega. Trala feira, comenta Raúl, “as sensacións
son moi boas e levámonos a casa a posibilidade de comezar a exportar
a nosa tecnoloxía”.
Como lembraremos, Park
App funciona como unha aplicación de balde que permite xeolocalizar
ao usuario, ofrecer a ruta máis curta para chegar a un parking
e, a través dun código QR, acceder ao aparcamento sen utilizar
ticket. Este desenvolvemento tecnolóxico, que permite que o móbil
interactúe coas barreiras do aparcamentos, supón en palabras dos
seus creadores “unha revolución na tecnoloxía que emprega este
sector e convértese na gran vantaxe competitiva da empresa”.
Detrás de Park App
atópanse catro enxeñeiros informáticos galegos, que son os que
deron forma á idea e xeraron a totalidade do sistema.