A alianza IBM-Apple xa superou as cen aplicacións profesionais para iOS
xoves, 17 de decembro do 2015
- Aplicación Fast Fix empregada pola multinacional Bosch
IBM
vén de superar a liña do centenar de aplicacións IBM MobileFirst
para iOS. Estes lanzamentos (xa máis de cen) abéiranse á
alianza da dita compañía informática con outro xigante, Apple,
unha colaboración dirixida entre outras cousas “a transformar a
maneira de traballar de múltiples sectores e profesións”. Estas
profesións abranguen actividades propias da saúde, da xestión
patrimoniais ou da distribución comercial. Así até chegar a un
total de 65 adicacións. Segundo informan as empresas, cada
aplicación que abrollou do acordo combina as capacidades de
tratamento avanzado de información masiva (Big Data) de IBM
coa longa e frutífera experiencia de usuario de Apple. Todas
comparten ademais outro nexo común: axudar ás empresas a acadar
novos niveis de eficiencia, efectividade e satisfacción do usuario,
cunha rapidez e facilidade “non vistas até agora”.
Entre as compañías
que tiran partido destas aplicacións para iPads e iPhones atópanse
Air Canada, AXA, Coca-Cola Amatil, o Servizo Postal Xaponés, Rimac,
e Vodafone Holanda. Tamén se atopa na lista a entidade financeira
Abu Dhabi Islamic Bank, unha das bancas máis referenciais de Oriente
Medio, que porá a disposición dos seus asesores financeiros a
app Trusted Advice para axudar a estes profesionais a acceder e
xestionar os segmentos de clientes, “de maneira doada e segura”,
dende os seus iPads. Outra das multinacionais que aposta polo
coñecemento xerado polo binomio Apple-IBM é Bosch, o fabricante de
electrodomésticos e maquinaria industrial, que está a tirar partido
da aplicación Fast Fix para que os seus enxeñeiros da área de
servizo ao cliente poidan acceder desde os iPads á potencia da
analítica de negocio, de tal maneira que estean en capacidade de
resolver máis axiña problemas ou incidencias que xurdan,
"As nosas apps,
que arestora representan un nivel exclusivo de valor para o negocio,
están a evolucionar para proporcionar capacidades cognitivas que
descobren a información máis relevante, o cal permite mellorar a
toma de decisións", afirmou Fred Balboni, director xeral da
alianza con Apple, en IBM, que engadiu que "froito da unión
entre a simplicidade do deseño de produto de Apple co incomparábel
nivel de seguridade, analítica e coñecemento dos sistemas
cognitivos de IBM, chega a tecnoloxía punta para a transformación
do negocio impulsada pola mobilidade".
IBM tamén lembra que
está a desenvolver aplicacións empresariais para iPad Pro que,
informa, “aproveitan ao máximo a meirande potencia do dispositivo,
o seu maior rendemento e a súa pantalla máis grande, así como as
funcionalidades multitarefa de iOS 9, o que permite que os
profesionais poidan traballar en dúas aplicacións ao mesmo tempo”.