A Xunta reducirá considerablemente o seu gasto en telecomunicacións
xoves, 6 de febreiro do 2014
Tras a reunión do Consello da Xunta de hoxe Alberto Núñez
Feijoo anunciou que a
Administración autonómica aforrará 13 millóns de euros cun novo contrato de
telecomunicacións que inclúe melloras do servizo nos ámbitos educativo,
sociosanitario e xudicial, para o que a Xunta tivo que “desbloquear os trámites
necesarios para poder adxudicar no primeiro semestre deste ano o contrato de
telecomunicacións da rede corporativa da Xunta, que proporcionará servizo de
Internet, telefonía fixa e móbil aos máis de 3.000 centros da Administración
pública”.
O novo contrato terá un orzamento de 39,3 millóns de euros (3 menos que o
contrato anterior) e requirirá por parte dos operadores adxudicatarios
investimentos de 12 millóns de euros. A licitación do concurso publicarase nos
vindeiros días por parte da AMTEGA, e tamén incluirá a integración das redes de
datos do CIXTEC e da CRTVG na Rede da Xunta, eliminando duplicidades de rede e
incrementando a redundancia nas comunicacións, garantindo a súa dispoñibilidade
en casos de incidencias.
Feijoo detallou que a nova situación contractual “abrangue tamén o mantemento
do equipamento electrónico de toda a Administración autonómica”, fronte ao
marco agora vixente en que este mantemento é xestionado por cada un dos
departamentos da Xunta. O novo contrato implica asumir o mantemento de toda a
infraestrutura, reducindo custos ao centralizar a contratación.
Ademais da mellora do ancho de banda e a ampliación das liñas de apoio (especialmente
en centros educativos, sociosanitarios e os xulgados), o novo concurso prevé
melloras adicionais como o obter rebaixas no prezo dos servizos que se prestan
en caso de que a Comisión do Mercado de Telecomunicacións ou organismos
internacionais establezan reducións nos prezos de mercado.
Durante a rolda de prensa do Consello, Feijoo destacou que o contrato prevé
tamén a ampliación a 5 Gbps da capacidade da rede corporativa, a renovación do
equipamento que estea obsoleto, así como a homoxeneización dos sistemas de
seguridade no acceso a internet, reforzando a seguridade ante posibles ataques
externos.
- O Consello da Xunta de hoxe desbloqueou os trámites para poder adxudicar o seu novo contrato de telecomunicacións