A Xunta reconstrúe dixitalmente o vello Portomarín e ofrece paseos virtuais pola vila
luns, 20 de novembro do 2023
O
Goberno galego compartiu os detalles dun novo proxecto autonómico de
dixitalización do patrimonio que reconstrúe e permite visitar a
antiga vila de Portomarín tal como era antes de quedar asolagada
polo río Miño en 1963 coa construción do encoro de Belesar.
Esta
nova experiencia intégrase dentro do Galiverso na Cidade da Cultura,
unha iniciativa que amosa dunha maneira diferente e aberta a riqueza
histórica e natural do país mediante o uso da Realidade Virtual.
Máis
de 250 casas, as hortas, o río e edificios emblemáticos como o
Hospital de Peregrinos e a igrexa de San Nicolás (que, como
lembraremos, foi trasladada pedra a pedra a unha nova localización
antes do asolagamento) foron recreados ao detalle en Galiverso.
O
secretario xeral técnico da Consellería de Cultura, Educación, FP
e Universidades, Manuel Vila, presentou esta mañá a
iniciativa no Museo Centro Gaiás, xunto co director xeral de
Cultura, Anxo M. Lorenzo, e a directora xerente da Fundación Cidade
da Cultura, Ana Isabel Vázquez.
Os
profesores de Historia da Arte da USC e membros do Centro de
Investigación Interuniversitario das Paisaxes Atlánticas Culturais
(CISPAC), Jesús Ángel Sánchez García e Julio Vázquez
Castro; os especialistas do Centro Infográfico Avanzado de
Galicia, Carlos Paz de Lorenzo e Anxo Miján Maroño, e Carlos
Seijo, do estudo dixital Maxina, forman parte do persoal implicado
nesta nova andaina do Galiverso.
Manuel
Vila destacou “o amplísimo traballo realizado por este equipo
multidisciplinar, cen por cen galego, para traer de novo á vida o
vello Portomarín, ofrecendo a posibilidade de coñecer de primeira
man como era a aquela vila á beira do vello leito do río Miño”.
Puxo o foco nas máis de 40.000 fotografías que José López, de
Foto Pereira, realizou para documentar os traballos de traslado dos
edificios e a memoria de cada unha das casas da localidade. “Estas
fotografías, as entrevistas cos veciños, así como os filmes
conservados na Filmoteca de Galicia foron fundamentais para
reconstruír con rigor científico a arquitectura, orografía e
paisaxe anegadas polas augas”, segundo explicou o profesor Jesús
Ángel Sánchez García no acto.
Vila
salientou tamén a expansión do Galiverso dentro do Museo Centro
Gaiás como parte da súa aposta por ampliar a oferta de contidos
culturais ligados á arte dixital. A experiencia pioneira de Carne
y Arena, o Galiverso e a próxima aventura sensorial
Hábitats. Natureza estendida, que se inaugurará en decembro,
“son mostra dunha liña de traballo fundamental na que se afondará
co futuro Centro de Artes Dixitais de Galicia”, dixo.