A Xunta investirá 34 millóns de euros na modernización da Xustiza a través das TIC

O primeiro Plan de Sistemas TIC da Administración de Xustiza en Galicia: Senda 2014, presentado hoxe no Consello da Xunta, busca dar solución as actuais dificultades coas que se atopan os profesionais do eido xudicial no uso das novas tecnoloxías e, ao mesmo tempo, dar resposta ás necesidades que establece a Nova Oficina Xudicial. Cun orzamento de 34 millóns de euros en catro anos, o Plan Senda 2014 establece, por primeira vez, un conxunto de as medidas para implantar de xeito efectivo as novas tecnoloxías na Xustiza.
O Plan, elaborado pola Xunta en colaboración con máis de 80 profesionais dos distintos ámbitos xudiciais, fixa seis liñas de actuación para avanzar na consolidación das TIC como elemento cotiá na actividade xudicial. A finalidade do plan é acadar unha Administración de Xustiza máis eficaz completando o proceso de informatización ata chegar ao expediente xudicial electrónico; conseguir que sexa máis transparente e próxima á cidadanía; garantir que os servizos TIC prestados sexan de maior calidade, ofrecendo solucións tanto para o cidadán como para o colectivo xudicial adaptadas ás características e á realidade de Galicia; mellorar a interoperabilidade entre sistemas de información dos distintos organismos, establecendo de un marco de colaboración co Ministerio de Xustiza que permita a evolución e adaptación do sistema de xestión procesual ás necesidades da Comunidade.
Tras a reunión semanal do Consello da Xunta, o presidente Feijoo explicou que o seu Goberno busca unha xustiza «máis áxil, máis próxima e máis segura», ademais dunha maior austeridade. Tamén destacou as actuacións da Xunta na mellora da xustiza en Galicia e lembrou que o Plan de infraestruturas xudiciais, cun orzamento de 97 millóns de euros, está actualmente en execución. Alberto Núñez Feijoo engadiu que «trátase de dotar ás localidades galegas de edificios mínimos para albergar as necesidades de recursos físicos que a xustiza necesita».
Feijóo salientou, como a segunda intervención da Xunta neste eido, a posta ao día da xustiza gratuíta, investimento en novas tecnoloxías no eido da xustiza recollido no Plan estratéxico do Goberno galego, que destaca a aposta pola economía do coñecemento. «Temos o compromiso de investir 260 millóns de euros nas novas tecnoloxías e levamos aprobadas no Consello da Xunta distintas actuacións concretas dentro deste obxectivo xeral de lexislatura», explicou.
Así, o titular do Goberno galego destacou os 26 millóns de euros do plan de modernización da propia Administración autonómica, o investimento de 9 millóns de euros para coordinar os investimentos dos concellos, deputacións e Xunta, e 102 millóns para conectar toda Galicia a través das infraestruturas tecnolóxicas, é dicir, para levar internet de banda larga aos concellos galegos.