A Xunta financiará proxectos de innovación tecnolóxica relacionados co Xacobeo
luns, 26 de outubro do 2009
A Consellería de Economía e Industria, a través do Diario Oficial de
Galicia, vén de publicar unha nova liña de axudas para o financiamento de
accións orientadas a produtos ou servizos de innovación tecnolóxica
relacionados co Xacobeo 2010, un proxecto que contará con preto de nove millóns
de euros para a súa execución, e que ten como principal obxectivo ofrecer
servizos de valor engadido mediante as TIC para os peregrinos e turistas que
visiten o noso país.
Con esta iniciativa, o Goberno galego está a acumular esforzos para
aproveitar a oportunidade que lle brinda o Xacobeo 2010 á nosa comunidade alén
dos eidos estrictamente relixioso e turístico, xa que, é unha ocasión, segundo
afirman, “para impulsar o desenvolvemento
económico mediante unha aposta pola investigación e a innovación tecnolóxica”.
Poderán ser beneficiarias destas subvencións as empresas de carácter
privado que teñan o seu domicilio social ou algún centro de traballo en
Galicia. As accións que se subvencionen deben utilizar as Tecnoloxías da
Información e das Comunicacións (TIC) para incrementar a calidade da oferta
turística, das actividades ou dos servizos relacionados co Xacobeo 2010. As
bases da convocatoria, que permanecerá aberta até o vindeiro 21 de novembro,
recollen a posibilidade de conceder anticipos de até o 80% da contía da axuda
para as empresas beneficiarias, de maneira que reciban parte da subvención
antes de efectuar o gasto, sen necesidade de presentar garantía a favor da
Xunta de Galicia.
En concreto, considéranse proxectos subvencionables nesta convocatoria
aqueles que poidan dar soporte mediante as TIC a servizos de valor engadido
para peregrinos e outras persoas interesadas no Xacobeo 2010, como son
dispositivos móbiles, de localización ou xeoreferenciación, redes sociais e web
2.0.
Subvencionaranse tamén desenvolvementos destinados a servizos audiovisuais
de promoción ou soporte das actividades do Xacobeo, proxectos que permitan
mellorar as tecnoloxías de restauración e estudo de elementos históricos,
artísticos e culturais vinculados ao Xacobeo e, en xeral, traballos baseados
nas TIC que supoñan un pulo á innovación e mellora da calidade da oferta
turística (promoción dixital do sector, mellora das relacións cos clientes,
incremento da oferta de servizos e diferenciación, etc).
Os formularios de solicitude das subvencións deberanse
obter, cubrir e imprimir a través da aplicación informática Axudas Virtual establecida na web da Xunta e na web da Consellaría de Economía e Industria.
As solicitudes presentaranse preferentemente na Oficina
de Rexistro Único e Información de San Caetano (Santiago de Compostela) ou ben
por calquera dos outros procedementos establecidos pola lei.