A Xunta aprobou hoxe o Plan Director de Banda Larga 2010-2013
xoves, 18 de febreiro do 2010
O Consello da
Xunta de Galicia, reunido hoxe en San Caetano para, entre outras cousas, tratar
de posibilitar o acceso á Rede de toda a sociedade galega e situar a nosa
Comunidade na vangarda do desenvolvemento tecnolóxico, vén de aprobar o Plan
Director de Banda Larga 2010-2013, que posibilitará estes e outros obxectivos
nun prazo máximo de catro anos.
Este Plan, que forma
parte dunha estratexia global do Goberno galego destinada a situar a Galicia no
núcleo avanzado da sociedade da información, constitúe o marco estratéxico de
actuación destinado a que a práctica totalidade dos cidadáns e empresas galegas
teñan acceso de calidade á banda larga.
Para isto cóntase
cun orzamento de 102 millóns de euros, que poderían ascender a máis de 232 se
as autoridades mobilizan capital privado e doutras administracións para lograr
un obxectivo comun: estender as novas tecnoloxías e as infraestruturas de
telecomunicacións de banda larga en todo o país.
Trátase dun plan
transversal que, segundo veñen de informar dende o Executivo, contou coa
colaboración de todas as consellerías da Xunta, dos concellos galegos, das
deputacións provinciais e dos organismos ou entidades públicas de eido local ou
provincial, así como dos distintos operadores de telecomunicacións.
Ademais de dotar
de redes fixas de alta capacidade (baseadas en fibra óptica) a aqueles núcleos
de poboación con maior demanda desatendida e que aínda non contan con acceso a
servizos de banda larga de calidade, a Xunta potenciará o actual operador
público Retegal, dotándoo de máis medios e capacidades para optimizar e
acelerar a estensión da banda larga.
Asemade, o Plan
permitirá aproveitar a infraestrutura pública actual e reducir os custes de
despregamento; favorecer a presenza dos operadores privados en todo o país;
estender a cobertura de banda larga aos núcleos de poboación rural; impulsar o
despregamento de infraestrutura de nova xeración (capaz de ofrecer velocidades
de conexión de ata 100 Mbps); promover o aproveitamento das novas tecnoloxías
no sector empresarial; modernizar a Administración pública e local e incentivar
a demanda deste tipo de tecnoloxía, entre outras cousas.
Porén o máis
importante desta iniciativa aprobada hoxe no Consello da Xunta, será a
prestación dun servizo de banda larga de calidade para toda a cidadanía, con
velocidades de acceso, segundo afirman, “superiores a 2Mbps, podendo chegar a 100Mbps no caso de redes
de nova xeración”.
- Feijoo presentou o novo Plan tras o Consello da Xunta
A Xunta tamén porá
a disposición dos concellos unha oficina técnica de asesoramento e soporte
sobre todas as iniciativas que se desenvolven en materia de redes de
telecomunicacións e manterá actualizado o Mapa de Infraestruturas, o que
permitirá dispor de documentación ampla e fiable que facilite a toma de
decisións.
Como
resultado de todas estas actuacións preténdese que en 2013 “o 94
por cento da poboación galega conte coa posibilidade de acceso a un servizo de
banda larga de calidade, e que a porcentaxe sexa do 100 por cen nos núcleos de
máis de 100 habitantes”. Asemade, o Plan cubrirá a demanda do 6 por cento
restante a través de servizos de acceso vía satélite, deste xeito, segundo
informan, “a curto prazo perséguese que
xa en 2011 se reduza en máis do 50 por cento a fenda dixital existente entre as
provincias da Coruña e Pontevedra con Lugo e Ourense”.
Outro
obxectivo para 2013 é que o 100 por cento dos núcleos con demanda por parte da
Administración pública e o 96 por cento das empresas dispoñan de acceso a banda
larga de calidade, “coa meta a curto prazo
de que en 2011 se cubra a totalidade dos polígonos industriais e dos parques
empresariais galegos”.