A Xunta afonda na súa aposta pola I+D e duplica os orzamentos
martes, 19 de decembro do 2006
- O novo plan de I+D da Xunta inclúe un orzamento de 800 millóns de euros
Logotipo e lema especialmente deseñados para a
ocasión, DVD de agasallo, esmero na posta en escena, tres consellerías
representadas, a presenza do presidente Emilio Pérez Touriño e unha sala que
non era (por así dicilo) unha sala de presentacións calquera: a principal do
Palacio de Congresos e Exposicións de Galicia (Santiago). Non era preciso
emprestar atención a máis detalles para enxergar o que xa se presentía no
aparcamento do devandito recinto de mostras, onde non collía un vehículo máis:
a presentación do Plan Galego de I+D+i é unha das grandes apostas do Goberno
autonómico e así se fixo saber ó público presente, integrado sobre todo por
investigadores, membros da política, empresarios, profesores e profesionais da
comunicación. Unha aposta que (isto tamén quedou claro abondo) se sustenta e se
equilibra sobre dous piares fundamentais: as persoas e a innovación. Este vai
ser polo tanto o vehículo ó que teremos que subir co fin de entrármonos (todos
e todas) nunha autoestrada, a da información no mundo, na que hai vehículos
máis potentes e veloces cós que podamos achegar os galegos, pero nunca se
sabe...
Para comezar, o Plan Galego de I+D+i parte da
liña de saída (e até 2010) cun orzamento de 800 millóns de euros -o que
significa o dobre da achega anterior nesta materia- que vai orientado a
conseguir unha contribución á Investigación e o Desenvolvemento do 1,5% do
Produto Interior Bruto de Galiza (antes de que remate a década). Con este novo
Plan 2006-2010, as Consellerías de Innovación, Economía e Educación queren
marcar distancias con todo o que se fixo antes en materia de apoio e fomento da
investigación. Para comezar, ten nome propio e diferenciado: IN.CI.TE., termo
que sería un resumo dos que constituirían, xunto coas propias persoas, os tres
grandes ingredientes deste proxecto: Innovación, Ciencia e Tecnoloxía.
O Plan ten intricadas ramificacións. É dicir:
non é só materia de interese para núcleos sociais pechados, nin se limita a
darlle un pulo ó sector científico e tecnolóxico nos eidos público e privado.
As súas finalidades semellan tocar de preto a tódolos galegos: impulsar o
crecemento económico e social de Galiza mediante a mellora da súa capacidade
científico-tecnolóxica, facilitar a participación das empresas no proceso de
innovación e achegar os beneficios da investigación ao conxunto da sociedade
galega.
O acto de “posta en longo” contou coa presenza
do presidente da Xunta, Emilio Pérez Touriño, e dos representantes dos tres
departamentos que están a pór as pedras do plan: Fernando Blanco, conselleiro
de Innovación, José Ramón Fernández, conselleiro de Economía e Laura Sánchez
Piñón, conselleira de Educación. Amais, na sala principal do Pazo de Congresos
estaban representados centros de investigación galegos e españois,
universidades e empresas do sector tecnolóxico. Esta certa mestura de
procedencias e opinións non foi casual. De feito, un dos principais obxectivos
do Plan é (precisamente) mobilizar baixo unha mesma loita (a de levar a Galiza
directamente ó sitio onde se toman as decisións na sociedade moderna e
tecnolóxica) diferentes frontes. En palabras de Touriño, o que se pretende é
crear un “marco coordinado para os
esforzos”. Deste xeito, tamén se buscaría unha meirande participación do
sector privado na consecución dos obxectivos, co fin de que no futuro (o ideal
sería antes de 2010) haxa incluso unha manobra de reaxuste de
responsabilidades. Dito doutra maneira e para que se entenda mellor: malia que
actualmente en Galiza unha boa parte da aposta pola I+D provén da propia Xunta
e os seus diferentes departamentos e centros científicos, sería un síntoma de
boa saúde que fosen as empresas as que paseniño asumisen un meirande peso neste
compromiso a prol do dito binomio, até (se é posible) darlle a volta á
situación.
Polo que respecta ó valor humano no que fai
fincapé o Plan, cómpre salientar que neste senso o obxectivo é “gañarlle a batalla á desprecarización da
carreira científica”, segundo dixo Touriño, e seguiu: “ó prever a incorporación de novos investigadores e superar a barreira
dos 10.000 ó remate do Plan”. Amais, favorecerase a incorporación de
investigadores ó sector empresarial (reforzando as ligazóns e o intercambio de
experiencias entre as universidades e as empresas), crearanse novos centros e
parques tecnolóxicos e científicos, fomentarase a cultura do coñecemento na
sociedade e promoverase a posta en valor das capacidades e resultados da
investigación pública. Asemade, entre outras moitas iniciativas concretas, o
Plan tamén inclúe medidas para mellorar a presenza da ciencia e a tecnoloxía
galegas na esfera estatal e internacional.