A Universidade de Vigo inicia un curso sobre consultoría para a innovación e o emprendemento
martes, 7 de setembro do 2010
Ao abeiro da
Cátedra Bancaja Xoves Emprededor@s da Universidade de Vigo, uns 35 estudantes
desta entidade académica están a aproveitar os últimos días que lles quedan das
vacacións para facer un Curso
de consultoría para a innovación e o emprendemento, que ten como
principal obxectivo dar a coñecer as principais técnicas, metodoloxías e
capacidades necesarias para desenvolverse laboralmente no campo profesional da
consultoría de empresas e organizacións, e máis concretamente, en temas
relacionados coa consultoría para a xestión da innovación e o emprendemento.
O curso, que se
desenvolve no salón de graos da Facultade de Ciencias Empresariais e Turismo,
botoa a andar onte luns, 6 de setembro, da man de Gerardo Estévez, director
xeral de PDI Consultores de Dirección, que ofreceu un relatorio sobre os tipos
e enfoques de consultaría, metodoloxías de traballo, principais ferramentas de
aplicación ou perspectivas sobre a carreira profesional dun consultor ou
consultora.
A coordinadora do curso, Ana Gueimonde, explicou que a medida que avance o
programa se irán tratando áreas de traballo máis concretas e asegurou que,
nesta liña, na xornada de hoxe, “os
relatores centraranse xa no campo da consultaría institucional e
emprendedorismo, así como na xestión de proxectos e actividades desenvolvidas
no centro tecnolóxico Aimen”.
O curso rematará o vindeiro venres coa xornada Green Coach, Aprendizaxe
de competencias directivas mediante a práctica do golf.