A Universidade de Vigo acolle un curso de mellora en OpenOffice para docentes

Xosé Antón Vila, profesor do curso

Ao falar de formación dixital entre a comunidade universitaria temos a tendencia de incluír unicamente ao alumnado. Porén, o eido de acción destas novas tecnoloxías do coñecemento é máis amplo, chegando non só a quen recibe eses datos senón tamén a quen lles dá forma e os emite. O caso é que tanto nun sentido como noutro, a necesidade de actualización é constante. Nesta liña de mellorar a canle e a feitura dos datos é onde se insire o curso OpenOffice e o seu uso na docencia universitaria que acolle o vindeiro mes a Universidade de Vigo, actividade que servirá entre outras cousas para afondar no emprego do dito paquete libre de programas ofimáticos e que abrangue procesador de textos, folla de cálculo, presentacións, ferramentas de debuxo vectorial e base de datos.
O curso, organizado en Vigo pola Vicerreitoría de Formación e Innovación Educativa, contará coa participación en labores de docencia de Xosé Antón Vila, profesor da ETSE de Enxeñería Informática, que afondará perante os seus compañeiros nas múltiples e variadas posibilidades que ofrecen estes sistemas operativos libres.
A iniciativa, de dez horas de duración, desenvolverase os días 8 e 15 de marzo de 10.00 a 14.00 horas e o 22 de marzo de 10.00 a 12.00 horas.
Segundo informa a Universidade, serán tres sesións dirixidas a calquera docente que estea interesado en aplicar as ferramentas do software libre ás súas materias. Os métodos a empregar serán os de prácticas guiadas e o material dispoñible ao completo ficará dispoñible na web para quen desexe facer uso del ou desenvolvelo, do mesmo xeito que calquera outra ferramenta informática aberta.
Entre outros temas, practicarase con procesadores de texto, presentacións multimedia, follas de cálculo e ecuacións matemáticas, bases de datos e tamén programas de debuxo.
O curso, que xa ten aberto o período de matrícula, conta con 20 prazas que se irán cubrindo por rigorosa orde de inscrición. A reserva de praza pode facerse a través da plataforma dixital, Bubela, ou tamén pedindo información no teléfono 986813596 ou no correo electrónico formacion.profesorado@uvigo.es.