A Universidade Pontifica de Salamanca pásase ao sistema libre Koha da man da galega Xercode
mércores, 26 de febreiro do 2014
Que as universidades están a facer esforzos por
tirar abaixo barreiras na comunicación é un feito que está fóra
de dúbida. A fin de contas, o software sen barreiras (o software
libre) permítelles boa marxe de manobra en materia de adaptacións
futuras, menos dependencia empresarial e, cómpre non esquecelo,
menos desembolso de cartos. Unha destas institucións é a
Universidade Pontificia
de Salamanca (UPSA), pioneira a nivel estatal en
migración cara a sistemas abertos en materia de xestión
bibliotecaria. Máis polo miúdo, é a primeira universidade española
que abandona o sistema privativo Innopac Millennium para afianzar no
seu seo o sistema open source Koha
ILS. Así
nolo conta Mancomún reflectindo informacións
da empresa galega Xercode, encargada de levar a cabo todo o
proceso.
Un tipo de proceso que, cómpre telo en conta,
constitúe un traballo complexo e de precisión. De feito, neste caso
concreto requiriu longas e exhaustivas tarefas de análise e deseño
de procedementos, nos que a a firma galega e a universidade
traballaron ombro con ombro co fin de achegar “un resultado
óptimo”, informa Xercode. En palabras de Maribel Manzano,
subdirectora da biblioteca, “con
máis de 350.000 rexistros bibliográficos para migrar, é necesario
ter a seguridade de que contas co respaldo dunha empresa que coñeza
perfectamente o sistema e cuxa resposta a calquera cuestión sexa
inmediata”.
Koha
ILS significa para a UPSA “un importante
avance organizativo e de identidade, que pon á súa disposición os
aspectos funcionais e de xestión requiridos dentro das bibliotecas
académicas e que, dado o seu carácter de fonte aberta,
permitiralles dispoñer dun sistema actualizado, adaptados ás súas
necesidades e un aforro económico respecto dos sistemas comercias
con licenzas”. Lembrar que Koha ILS é un sistema integrado de
xestión de bibliotecas (SIXB) distribuído con licenza GPL2. Foi o
primeiro SIXB libre e o seu desenvolvemento está promovido por
bibliotecas de diversos tipos e tamaños, voluntarios, e empresas de
todo o mundo. Xercode, pola súa banda, é unha firma galega
integrada na asociación AGASOL e pioneira a nivel estatal en achegar
soporte oficial a Koha ILS. Nesta liña ofrece servizos para todo o
ciclo de afianzamento do sistema: consultoría, instalación,
desenvolvemento, migración, formación, soporte e mantemento
evolutivo.