A UVigo, o Clúster TIC e Abanca ofrecerán formación tecnolóxica de balde
mércores, 22 de abril do 2020
O
Clúster
TIC Galicia e Abanca, coa alianza estratéxica da Universidade de
Vigo e a colaboración da Imatia e Bysidecar, impulsaron o lanzamento
de Campus Dual, unha iniciativa pioneira e innovadora dirixida a
dotar á comunidade autónoma galega dunha “canteira de talento
laboral no ámbito das Tecnoloxías da Información e a Comunicación,
converténdose así nunha nova fonte de desenvolvemento social”, en
palabras da UVigo, que salientou que a iniciativa incluirá formación
cen por cen de balde.
Vinculado
ás actuacións do Plan de Promoción do Talento Dixital da Xunta, ao
que está adherido o Clúster TIC, e coa incorporación de Abanca,
este programa trata de axudar a paliar “a grave situación
económica creada pola COVID-19”, pondo enriba da mesa toda unha
serie de cursos formativos totalmente gratuítos e que capacitan para
traballar no sector TIC. Estas iniciativas formativas están abertas
tanto a estudantes de Formación Profesional e universitarios/as que
están acabando os seus estudos e non contan cunha empresa onde
realizar as prácticas que necesitan para iniciar a súa
incorporación laboral, como a persoas con experiencia profesional
que foran vítimas da ola de despidos provocada por esta crise, se
ben, en ambos casos, as prazas son limitadas e efectuarase un proceso
de selección.
Os
cursos terán unha duración de 12 semanas e organizaranse en grupos
de nove estudantes, divididos en equipos de tres persoas que serán
supervisados por programadores/as profesionais da spin-off da
UVigo Imatia Innovation. “Son programas formativos moi prácticos”,
informou a Universidade, engadindo que as actividades serán
semellantes “ás que pode atopar un usuario ou usuaria nun posto de
traballo, combinando sesións en grupo, aprendizaxe individual e
traballo en equipo”.