A UVigo lanza un globo á estratosfera para analizar os compoñentes do satélite FemtoSat
martes, 19 de febreiro do 2013
O
Grupo de Enxeñaría Mecánica e Automoción (CIMA) traballa arreo
nun experimento pioneiro para analizar compoñentes e subsistemas nun
ambiente con características semellantes a estar en órbita. Para
isto -Gabriel García, Miguel López, Pablo Yáñez e Jacob López-
lanzaron
dende o aparcadoiro da Escola de Enxeñería Industrial o globo
Ballon
Xat 001,
que forma parte deste proxecto da Universidade de Vigo co que se
quere comprobar compoñentes e sistemas novos picosatélites mediante
o lanzamento deste globo á estratosfera. Dicir que o devandito
ensaio constará de cinco lanzamentos máis para ir probando o
comportamento das baterías, o sistema de despregue de antenas,
paneis solares, electrónica… e todo isto a un custe menor do que
suporía enviar o aparello ao espazo.
Engadir
que este será o lanzamento máis sinxelo, xa que nos vindeiros
globos irán facéndose probas de hardware
dentro do proxecto FemtoXat, co que se vai desenvolver un dos
satélites máis lixeiros do mundo, con apenas 250 gramos.
Máis
polo miúdo, o globo de látex lanzado á estratosfera tiña 1,5
metros de diámetro, foi enchido con helio e acadou os 30.000 metros
de altura (o triplo dun voo comercial). A esa altitude o globo
estourou, soltando a valixa cunha carga útil que suxeita a un
paracaídas descendeu até caer, 180 minutos despois e a 140
quilómetros de Vigo, en Escairón (Lugo). O equipo recuperaba “a
caixa negra”
dos experimentos que contaba no seu interior cun sistema de medición
e almacenamento dos valores de temperatura e do campo
magnético terrestre; cunha cámara de vídeo encargada de filmar en
todo intre; cun GPS e unha batería de ión-litio para posible uso en
satélite.
Por
último salientar que, logo do éxito importante do lanzamento do
primeiro satélite galego e primeiro cubesat español -o XaTcobeo-,
axiña se verá o lanzamento do Humsat e do FemtoXat; o primeiro en
maio dende Rusia e o segundo a comezos de 2014.