A UVigo achega unha tecnoloxía que optimiza o control de obras de edificios
luns, 21 de xaneiro do 2019
A
semana pasada desenvolveuse a proba piloto xeral dun sistema
tecnolóxico chamado a facer máis eficientes e sustentábeis os
procesos de construción de edificios. O sistema en cuestión, unha
tecnoloxía de Intelixencia Artificial que mellora a calidade e
reduce custes no control de obras,
foi mostrado nos seus detalles perante os socios implicados no
proxecto do que abrolla (o proxecto Auto-BIM, enmarcado no programa
Retos-Colaboración 2016 e financiado con preto de un millón de
euros). O consorcio que impulsa esta tecnoloxía, liderado pola
firma Vías y Construciones e coa participación activa do grupo de
investigación en Xeotecnoloxías Aplicadas da Universidade de Vigo,
rematará o seu traballo en marzo. A proba piloto, celebrada nun
edificio en construción, desenvolveuse con éxito.
Para
levar a cabo a experiencia elixiuse un bloque de vivendas en
construción na localidade catalá de Badalona e os resultados
acadados demostraron que o software deseñado “axuda moito na
redución de tempos e na sistematización e mellora do control de
calidade de obras de edificación, informatizando o proceso de
seguimento da evolución de obra e detección de desviacións
respecto ao planeado, o que se traduce na redución de custes,
axilización das obras e mellora da calidade”.
O
proxecto púxose en marcha co obxectivo de crear e validar unha nova
metodoloxía para a adquisición, procesado e xestión de datos
espaciais tridimensionais en espazos interiores sen cobertura GNSS, o
sistema global de navegación por satélite. Segundo explica Lucía
Díaz-Vilariño, investigadora do Grupo de Xeotecnoloxías Aplicadas,
a adquisición de datos feita coa metodoloxía devandita encárgase
de realizala un robot móbil autónomo e os resultados obtidos son
integrados en modelos de información estandarizados BIM (Building
Information Modelling).
Dentro
do marco deste proxecto, o grupo de investigación en Xeotecnoloxías
Aplicadas da Universidade de Vigo foi o encargado de deseñar a
aplicación que permite a planificación óptima da toma de datos por
parte da unidade robotizada nas distintas fases da obra dun edificio
en construción.
Pola
súa banda, o centro tecnolóxico galego Aimen encargouse de
desenvolver o sistema robotizado autónomo; a empresa Aplitop, como
entidade experta en tratamento de nubes de puntos, ocupouse do seu
filtrado, aliñamento e referenciado; ApliCAD e o grupo de
investigación Tidop da Universidade de Salamanca desenvolveron os
algoritmos para a extracción semántica e comparación con modelos
BIM e o grupo BAC Engineering Consultancy definiu os criterios de
calidade da nube de puntos determinando criterios de aceptación e/ou
rexeitamento das xeometrías obtidas co sistema robótico autónomo.