A USC levou ao Mobile World Congress 2016 dúas spin-off
luns, 29 de febreiro do 2016
Barcelona
acollía a pasada semana, do 22 ao 25 de febreiro, unha nova edición
do Mobile World
Congress 2016, un dos encontros máis senlleiros da tecnoloxía a
nivel internacional no que tamén houbo presenza galega. Máis polo
miúdo, investigadores
da Universidade de Santiago de Compostela (USC) representando a Rede
de Centros Singulares de Investigación levaron á cita catalá as
súas respectivas empresas: Situm Technologies e MD.Use Innovative
Solutions. Estas dúas start-up,
vían a luz ao abeiro do CiTIUS (Situm) e o CiQUS (MD.Use), sendo
creadas por investigadores egresados destes centros, converténdose
pouco despois en spin-off
oficiais da USC.
Indo
por partes, Situm Technologies acudía
ao Mobile World Congress (MWC) de Barcelona coa nova versión da súa
plataforma de localización en interiores, explicando os seus
representantes as melloras da versión definitiva tanto en rendemento
como en precisión, funcionalidade e experiencia de usuario. Logo de
máis de oito anos de investigación avanzada, Situm achega aos seus
clientes unha solución que non só proporciona a máxima precisión
coa mínima infraestrutura, senón tamén unha ferramenta de mapeo de
interiores máis rápida, con detección automática de planta en
edificios de varios andares e control de calibración de calidade. O
seu sistema consegue reducir a marxe de erro e o custo con respecto a
outras tecnoloxías de posicionamento en interiores.
En
canto a MD.Use Innovative Solutions,
cómpre sinalar que era fundada en 2015 por un equipo liderado pola
investigadora do CiQUS Rebeca García Fandiño e o físico da USC
Ángel Piñeiro, xurdindo coa vontade de achegar ferramentas
computacionais a usuarios non especializados, tentando minguar a
separación entre o mundo experimental e o da computación. A empresa
comercializa estudos computacionais de sistemas moleculares
específicos e personalizábeis para optimizar os procesos
industriais, co obxectivo de facilitar o deseño de novos materiais
ou dispositivos baseados en técnicas a nivel molecular.