A USC lanza unha app para facer comunidade e mellorar o diálogo
xoves, 19 de decembro do 2019
Logo
dos recentes traballos de remodelación da web institucional,
www.usc.gal, dos que falamos
polo miúdo os días pasados, a Universidade de Santiago vén
cumprir coa previsión lanzada na estrea da páxina web e pon
ao alcance da comunidade dos campus a súa aplicación para
dispositivos móbiles. Trátase, nas súas palabras, “dunha
ferramenta que abre novos espazos de diálogo coa comunidade
universitaria e a contorna social”. De feito, comparte coa web a
mesma filosofía: é un recurso dinámico que se fixo (e se seguirá
a facer) atendendo as necesidades e as propostas de toda a comunidade
universitaria.
A
app, que xa pode descargase de balde, permitirá recibir e
intercambiar información actualizada ou realizar trámites coa
Universidade de xeito máis doado. A aplicación nace coa vontade de
“conformar unha canle áxil, eficiente e inmediata de conexión da
USC cos seus públicos”, explicou a institución académica,
concretando logo os seus elementos destacados. Por exemplo unha
versión virtual da Tarxeta Universitaria Intelixente (TUI),
extrapolando as súas funcionalidades ao ámbito dos dispositivos
móbiles para facilitar cousas como o empréstamo de libros (que á
hora de pedir un libro no mostrador da biblioteca abonde con amosar a
TUI que aparece dentro da app sen necesidade de levar a
TUI física); un muro de noticias que manterá ao usuario informado
de toda a actualidade da USC; un calendario institucional e
académico, cualificacións ou mensaxería instantánea. Este sistema
informa tamén da localización dos principais servizos aos que o
alumnado pode ter que dirixirse nalgún momento.
Segundo
engade a USC ao fío do mundo de posibilidades concretas que se abre
coa ferramenta, “a paulatina incorporación da aplicación á vida
cotiá das persoas que integran a comunidade universitaria permitirá
tamén que aos alumnos e alumnas que se matriculen por primeira vez o
vindeiro curso, non se lles entregue a TUI xa que esta xa está
contida dentro da app”. Amais, explica a institución,
tampouco se lles renovará a TUI física a aquelas persoas que a
perdan.
Esta
nova aplicación nace como froito do convenio que a Universidade
acaba de renovar co Banco Santander, e dende a USC segue a
traballarse no desenvolvemento de novas funcionalidades futuras. A
app da Universidade pode descargarse en calquera dispositivo
iOS ou Android buscándoa directamente na tenda de aplicacións.