A USC acollerá a primeira xornada do TechDay Tour 2013 de Microsoft

O vindeiro 19 de novembro a compostelá Escola Técnica Superior de Enxeñaría inaugurará o TechDay Tour 2013, unha xornada organizada por Microsoft coa colaboración de RedEmprendia e a propia USC e encamiñada a estudantes, novos emprendedores e profesionais. Emporiso, esta actividade incluirá diferentes sesións temáticas, programadas segundo o perfil profesional dos asistentes, sobre deseño de aplicacións, emprendemento e as últimas plataformas e ferramentas de desenvolvemento da compañía americana.
Cómpre subliñar que na devandita sesión participarán: Alfredo Bermúdez de Castro -responsable de Desenvolvemento de Negocio de RedEmprendia- quen traballará cos emprendedores sobre como presentar de xeito efectivo os seus proxectos e ideas de negocio. Intervirá tamén Guillermo Viña -xerente de Igape Nova- quen falará sobre o actual ecosistema de apoio ao emprendemento en Galicia e resolverá dúbidas sobre as axudas existentes. Asemade, neste TechDay Tour presentaranse servizos e apoios de Microsoft para a comunidade emprendedora (programas BizSpark e Microsoft Ventures), testemuñas de emprendedores e unha sesión de networking. Isto no caso dos emprendedores, en canto aos desenvolvedores, responsables de sistemas e estudantes de enxeñaría informática, están programadas sesións arredor dos servizos e ferramentas de Microsoft en eidos como a xestión de centros de datos ou a programación e desenvolvemento de aplicacións móbiles.
O TechDay Tour de Microsoft percorrerá nos meses de outubro e novembro outras cinco cidades españolas: Barcelona, Bilbo, Valencia, Sevilla e Logroño.
Engadir que a asistencia a todas as sesións deste TechDay Tour 2013 é gratuíta (previa inscrición, xa que as prazas son limitadas).