A USC acolle unha reunión de socios do proxecto europeo para producir silicio sustentábel
luns, 20 de xuño do 2022
A
Facultade de Matemáticas da USC acollerá este martes 21 de xuño
unha xuntanza de socios do proxecto europeo
SisAI Pilot, que se dirixe a producir silicio (un dos compoñentes
básicos dos dispositivos electrónicos) de maneira sustentábel e
cun mínimo de impacto ambiental. O acto, que será presentado por
Elena Vázquez Cendón, decana da facultade de Matemáticas da
Universidade de Santiago, contará coa presenza de Gabriella Tranell,
coordinadora do proxecto e profesora da Universidade Norueguesa de
Ciencia e Tecnoloxía, e Rosa María Crujeiras, directora científica
en funcións do CITMAGA. O acto comeza ás 9.30 horas. Participan
investigadores galegos, europeos e americanos. O encontro está
promovido polo Centro de Investigación e Tecnoloxía Matemática de
Galicia.
Coordinado
desde a Universidade Norueguesa de Ciencia e Tecnoloxía (NTNU),
SisAI Pilot está promovido por un consorcio internacional de 22
socios, do que forman parte centros de investigación europeos como o
Centro de Investigación e Tecnoloxía Matemática de Galicia
(CITMAG) e empresas nacionais e internacionais para a aplicación dos
resultados, entre elas a galega Fundiciones Rey.
A
apertura do encontro será ás 9:30 horas. Participarán a decana da
facultade de Matemáticas da Universidade de Santiago, Elena Vázquez
Cendón; a coordinadora do proxecto e profesora da Universidade
Norueguesa de Ciencia e Tecnoloxía Gabriella Tranell; xunto á
directora científica en funcións do CITMAga, Rosa María Crujeiras.
Durante
a xornada os asistentes (procedentes de Noruega, Alemaña, Francia,
Islandia, Italia, Grecia, EEUU, Sudáfrica e España) porán en común
os principais avances logrados no último ano do proxecto.
Iniciado
hai dous anos e cunha duración de catro, está financiado polo
programa de investigación e innovación Horizon 2020 da Unión
Europea, cun orzamento global que supera os 14 millóns de euros.
Na
xornada do mércores os participantes realizarán unha visita a
Fundiciones Rey en Vilagarcía de Arousa e a Rey Bronze Castings en
Cuntis. Terán así a oportunidade de coñecer en fábrica o
funcionamento deste proxecto piloto.
Creado
a finais de 2021, impulsado polo tres universidades galegas, CITMAGA
aspira a converterse nun centro de investigación de referencia no
que se integran as capacidades científicas das Matemáticas, pero
ademais cunha clara aposta pola transferencia de coñecemento,
fundamentalmente á industria autonómica e nacional.
O
CITMAGA, a respecto das orixes e dos porqués deste proxecto, sinala
que este responde ao reto de introducir meirande sustentabilidade na
produción tecnolóxica: “Os nosos hábitos de consumo fan que a
sociedade moderna teña unha necesidade inxente de silicio. O seu uso
esténdese desde a fabricación de compoñentes electrónicos
(microchips de teléfonos, coches, computadores), aliaxes
(especialmente de aluminio, que se usa cada vez máis en coches,
avións e todo tipo de aliaxes lixeiras) e estes últimos anos na
industria relacionada coa enerxía fotovoltaica, onde a placa de
silicio é o elemento que permite producir enerxía a partir da luz
do sol”. Ademais, na actualidade, o silicio considérase un
material crítico para Europa debido aos riscos no seu
aprovisionamento e a súa importancia económica”.