A USC achega os mapas históricos da súa Biblioteca en formato dixital e acceso libre
xoves, 5 de xaneiro do 2017
- O Map 212, o manuscrito orixinal en cor do proxecto do parque da Alameda de Santiago
A
Biblioteca
da Universidade de Santiago vén de anunciar a apertura para os
internautas da súa senlleira colección de mapas históricos. A
disposición destes mapas en acceso libre e formato dixital forma
parte dun proxecto máis amplo para preservar, difundir e poñer en
valor este patrimonio. A respecto disto, a USC lembra que algúns dos
elementos dixitalizados son pezas de singular valor. En total,
trátase de 600 documentos. Podemos velos dende xa a través do
repositorio
institucional Minerva.
Neste
acubillo en liña, Minerva, poden ser consultados, visualizados e
descargados de xeito libre e gratuíto. Os traballos de recuperación
e dixitalización seguen arestora en activo. O labor deu comezou cos
documentos anteriores a 1900 e con ligazóns coa nosa terra. Segundo
fai saber a USC, o proxecto da Biblioteca para adaptar aos novos
formatos as súas coleccións do fondo antigo contribuirá “á súa
preservación en paralelo coa súa difusión a través da Rede,
posibilitando así o seu uso remoto e continuado por parte de persoal
investigador e estudosos/as”.
Pezas
de gran valor
Os
documentos tratados áchanse na actualidade, fisicamente, na
Biblioteca Xeral da USC. Entre eles, en palabras dos responsábeis
dos traballos, atópanse “realmente curiosos e valiosos”. É o
caso do Map
212, mapa manuscrito orixinal en cor do proxecto de creación
do que hoxe é o parque da Alameda de Santiago, de Blas Galiano e
datado en 1831, considerado o plan de reforma desta zona da cidade e
de facto da creación do parque. Outro “exemplo único” é o
rexistrado como L
5064 e que a partir da Carta geométrica de Domingo
Fontán, impresa en 1845, inclúe unha actualización manuscrita coas
estradas e liñas de ferrocarril dispoñíbeis en 1917.