A UDC fortalece a súa excelencia coa incorporación de dous novos investigadores
mércores, 24 de abril do 2019
A
Universidade da Coruña vai contar con dous novos investigadores do
ámbito computacional e político-cidadá. Trátase de José A.
Iglesias Guitián, investigador en Ciencias da Computación e experto
en cálculo de alto rendemento visual e gráfico, e Mónica Ferrín,
investigadora en Ciencias Políticas, nova democracia e participación
cidadá. As novas incorporacións, que traballarán na UDC a través
do programa InTalent (proxecto singular de colaboración entre a UDC
e Inditex para captar talento e xerar coñecemento avanzado dende
Coruña), foron
presentadas oficialmente este mércores polo reitor Julio Abalde, e o
vicerreitor Salvador Naya.
Na
súa intervención, Mónica Ferrín mostrou a súa satisfacción por
volver a Galicia “despois de vinte anos fóra” e agradeceu
efusivamente ao programa InTalent UDC-Inditex que faga posíbel este
retorno.
Pola
súa banda, José Iglesias sumouse aos agradecementos á
multinacional e á UDC “por ter feito realidade este acordo que nos
trae de volta a casa”, no seu caso foron doce os anos que estivo
fóra de Galicia.
O
reitor cualificou o día de hoxe como “moi importante para a
Universidade da Coruña”, salientando que o programa InTalent é xa
un sinal de identidade polo que “a UDC é recoñecida a nivel
internacional”. Asemade, subliñou o feito de que dos seis
investigadores incorporados ao abeiro da iniciativa, tres sexan
mulleres: “Non foi un efecto buscado porque as solicitudes
avalíanse en base ao seu currículo académico e profesional, pero é
moi satisfactorio ter esta paridade e ademais incorporar
investigadores de todas as áreas de coñecemento”.
Nesta
terceira convocatoria do InTalent UDC-Inditex presentáronse 106
solicitudes de investigadores do máximo prestixio de 26
nacionalidades, como puxo de relevo o vicerreitor de Política
Científica, Investigación e Transferencia.
Segundo
explica a Universidade da Coruña, José A. Iglesias Guitián é
investigador en Ciencias da Computación. A súa especialización é
a computación visual e a computación gráfica. Actualmente traballa
no Centre de Visiò per Computador e é investigador asociado da
Universitat Autònoma de Barcelona, colaborando tamén como docente.
Anteriormente traballou durante case dous anos para The Walt Disney
Company e Disney Research. Incorporarase á UDC no vindeiro mes de
setembro. Ao longo da súa carreira investigadora publicou 14 artigos
en revistas, nove dos cales están publicados no top 3 na listaxe de
revistas referenciadas en computación gráfica. É co-inventor de
tres patentes en USA e foi galardoado cun Disney Inventor Award en
2016.
Mónica
Ferrín Pereira licenciouse en Ciencias Políticas e da
Administración na Universidade de Santiago de Compostela. É doutora
en Ciencias Políticas e Sociais polo Instituto Universitario
Europeo, un centro internacional para estudos doutorais e
pos-doutorais financiado pola Comisión Europea e os estados membro
da UE. A súa tese doutoral Que é a democracia para os cidadáns?
(What is democracy to citizens?) obtivo o Premio Juan Linz á
mellor tese doutoral en Ciencia Política polo Centro de Estudos
Políticos e Constitucionais.