A UDC amosará a 60 persoas metodoloxías para mellorar o ensino na era dixital
venres, 7 de xullo do 2017
Este 10 de xullo comeza na Coruña, na Facultade de
Ciencias da Educación, unha actividade formativa sobre docencia na
era das novas tecnoloxías: docencia empregando as TIC e docencia
botando as man das TIC. O
Curso de verán Docentes conectados: o reto de educar na era
dixital será inaugurado polo
reitor da Universidade da Coruña, Julio Abalde, a vicerreitora
de Oferta Académica e Innovación Docente, Nancy Vázquez, e o
decano da Facultade de Ciencias da Educación, Manuel Peralbo. O
curso, ao que están apuntados preto de sesenta participantes, ten
como finalidade “propiciar un lugar de debate entre os profesionais
do ensino para intercambiar ideas e experiencias sobre a práctica
docente, así como para a aprendizaxe de técnicas, metodoloxías e
recursos para mellorar o proceso de ensino nun contorno dixital”.
O
programa da actividade formativa
está artellado en varios obradoiros e conferencias plenarias. A
conferencia inaugural, prevista para as 10.00 horas do luns, leva
como título Discapaciquén? e correrá a cargo de Fátima
García Doval, doutora en Didáctica e Organización Educativa:
Investigación e Innovación pola Universidade de Santiago de
Compostela. Co-directora de ACCEGAL e directora ata 2014 do Centro de
Educación Especial Manuel López Navalón de Santiago. Actualmente é
responsábel do Servizo de Formación do Profesorado na Consellería
de Educación.
O curso pecharase o martes, ás 18h., coa
intervención Nativos dixitais? Nin están nin se sabe deles
de Javier Pedreira, Wicho, coautor do libro Los nativos digitales
no existen e editor do blog Microsiervos.com.
Esa tarde, antes da conferencia de clausura, presentarase un panel de
experiencias innovadoras no ámbito educativo en Galicia: da área de
ESO/Bacharelato, Ciencia cidadá, de José M. López Viñas,
do IES David Buján; da área de FP, Guía turística plurilingüe
en liña do profesor Miguel Ángel Rubio Bajo, do CIFP Rodolfo
Ucha, de Ferrol; e do ensino universitario, Fomentando a
responsabilidade social nos estudantes de enxeñaría a través de
distintas experiencias de aprendizaxe-ensino, da profesora Ana
Isabel Ares Pernas, da EU. de Deseño Industrial da UDC.