A UDC alíase co tecido empresarial galego para optar a axudas por 7 millóns de euros
xoves, 11 de abril do 2013
A
segunda convocatoria de FEDER-Innterconecta, fondos europeos e
galegos cos
que prevé a mobilización dun investimento público-privado de 150
millóns de euros, segue sumando adhesións e aspirantes. Segundo
informa este xoves a Universidade da Coruña, a entidade educativa
presentou á convocatoria unha serie de solicitudes por un valor de
sete millóns de euros, sendo o obxectivo o de desenvolver proxectos
de innovación e desenvolvemento con empresas da Coruña e a súa
contorna. Lembrar que estas axudas, na súa edición galega, están
xestionadas polo Centro para o
Desenvolvemento Tecnolóxico Industrial (CDTI) e a Axencia
Galega de Innovación (GAIN), sendo a súa finalidade permitir a
materialización dos grandes proxectos de I+D que xurdan da
colaboración empresarial cos nosos centros de investigación.
De
feito, para
concorrer a estas axudas, informa
a UDC, é
requirimento fundamental que se dea en cada iniciativa unha
cooperación entre empresariado e
organismos de investigación, polo que a Universidade da Coruña
buscou aliados entre compañías
galegas
de sectores estratéxicos para o desenvolvemento do país: “En
concreto, asináronse 79 contratos de I+D con 64 empresas galegas
para presentar 33 proxectos a esta convocatoria, o que supón preto
do 30% das propostas de I+D presentadas en Galicia, que foron 119”,
informa
a UDC. E
engade: “Nestes
contratos participan un total de 21 grupos de investigación da
Universidade da Coruña destacando os ámbitos das Tecnoloxías
da Información
e a Comunicación,
as
TIC,
e as enxeñarías”.
A convocatoria está dotada con 75 millóns de euros, sendo
a previsión a de mobilizar 150 millóns de investimento público e
privado. Destes
75, os
centros de I+D só poden optar ao 15% dos recursos e o resto é para
o sector empresarial. Segundo manifestou o vicerreitor de
Investigación e Transferencia, Ricardo Cao, este programa de
fondos “é
un acicate para impulsar e consolidar a colaboración entre a
universidade e a empresa, nunha etapa en que os recursos económicos
dedicados á I+D+i son cada vez máis escasos”.