A Torre de Hércules e a Catedral de Santiago, entre os vinte monumentos máis populares de Instagram do ámbito estatal
venres, 29 de outubro do 2021
Libiku,
servizo comparador de alugueres vacacionais, vén de publicar o
ranking dos monumentos españois máis populares na rede
social Instagram, unha clasificación na que se poden consultar os
principais destinos turísticos do ámbito estatal e, concretamente,
os máis compartidos neste servizo. Son, en palabras de Libiku,
“lugares ideais para visitar durante unha escapada ou viaxe en
calquera momento do ano, e para sacarnos as mellores fotos”.
A
listaxe está encabezada pola Sagrada Familia de Barcelona (2.336.000
#sagradafamilia), A Alhambra de Granada (1.684.000 #alhambra), o Parc
Güell de Barcelona (350.700 #parcgüell), o Palacio Real de Madrid
(255.580 #palacioreal) e a Casa Milà de Barcelona (231.000
#casamila). Os primeiros monumentos galegos en figurar na listaxe son
a Torre de Hércules da Coruña (no número 12 da clasificación con
86.600 publicacións) e a Catedral de Santiago de Compostela (no
número 13 con 74.000 publicacións).
Para
levar a cabo este estudo tivéronse en conta máis de 200 monumentos
situados en España, excluíndo aqueles de orixe natural. O número
de publicacións foi obtido utilizado o buscador interno da rede
social Instagram. Os datos foron recollidos entre o 21/10/2021 e
26/10/2021.