A TDT, a banda larga e as novas canles de radio e televisión galegas, a exame
mércores, 20 de outubro do 2010
Coa chegada da TDT a todos os fogares
galegos (ao igual que sucedeu no resto das Comunidades do país), a oferta
televisiva no noso país pasou de ofrecer unhas poucas canles de temática
xeneralista a contar cun considerable número de cadeas temáticas e
especializadas (de ámbito local, autonómico e nacional) para as cales, de
querer ver algo da súa programación, nos faría falta aumentarlle unhas seis ou
sete horas ao día.
Por isto, e tamén porque é a primeira vez
que se convoca nos últimos anos (na anterior lexislatura nunca chegou a
convocarse), a última reunión da comisión permanente do Consello Asesor de
Telecomunicacións de Galicia, celebrada hoxe mesmo, agárdabase como auga de
maio.
Nela, este organismo abordou, entre
outras cuestións, o Plan de reasignación
dos múltiplex dixitais, que permitirá incrementar a oferta televisiva da
TDT ata un total de 40 canais de televisión, incluíndo os de ámbito autonómico
e local.
Na xuntanza, que estivo presidida por
Alfonso Cabaleiro Durán, secretario xeral de Medios e presidente do Consello
Asesor de Telecomunicacións e Audiovisual de Galicia, analizouse polo miúdo o
chamado Decreto do dividendo dixital
que vai permitir liberar unha parte das frecuencias (os canais radioeléctricos
do 61 ao 69 de UHF) que eran empregados ata o de agora por outros servizos de
telecomunicacións relacionados co desenvolvemento de redes de comunicación
móbiles de banda ampla.
Este decreto, segundo se constatou na devandita
reunión, terá “dúas consecuencias
importantes a medio prazo”: por
unha banda, a aparición de novos múltiplex dixitais, que desde hai unhas
semanas xa están empezando a despregar as televisións coa posta en marcha de
novas instalacións nos centros emisores; e, por outra, isto vai supoñer que os
múltiplex que actualmente se podían recibir nos fogares (os canais
radioeléctricos do 61 ao 69 de UHF) deberán cambiar de frecuencia, o que leva
aparellado a necesidade de adaptación das antenas e a resintonización dos
receptores de TDT que teñen os cidadáns, cun importante custo para os
operadores, as administracións e a cidadanía.
Desenvolvemento da
TDT 2010-2012
Para paliar os efectos desta necesaria
reestruturación, o Goberno galego, segundo vén de anunciar, “vai pór en marcha o Plan de cambio de
frecuencias da TDT 2010-2012, un complemento necesario para que toda a
poboación galega, especialmente no eido rural, poida disfrutar destas novas melloras
no servizo de TDT”.
Con esta iniciativa (necesaria por mor
dos cambios que obriga a levar a cabo o Real Decreto do dividendo dixital e tamén
pola aparición da televisión en alta definición, HD) a Xunta de Galicia, segundo
informa, “tenta minimizar o impacto dos
cambios, recompilar toda a información necesaria, facela chegar oportunamente e
comunicala á cidadanía para poder comprender e resolver as dúbidas e os
problemas técnicos que se poidan plantexar. Para iso, nas vindeiras semanas
convocaranse reunións informativas, especialmente orientadas ás Administracións
locais, para detallar os obxectivos e eixes concretos deste plan”.
Outorgamento de
licenzas de radiodifusión
A comisión permanente do Consello Asesor
de Telecomunicacións e Audiovisual de Galicia tamén abordou a necesidade de
aprobar o novo decreto que regule o réxime xurídico dos prestadores do servizo
de comunicación audiovisual radiofónica e que permita a adaptación á Ley 7/2010, General de Comunicación
Audiovisual.
A necesidade deste decreto vén motivada,
ademais, pola convocatoria dun concurso para o outorgamento de 84 licenzas para
a explotación do servizo de radiodifusión sonora de carácter comercial con
modulación de frecuencias.
Plan de Banda Larga
A comisión permanente tamén abordou a
situación e o avance do Plan Director de Banda Larga de Galicia 2010-2013, como
eixe de modernización e de desenvolvemento económico de Galicia, que ten como
principal obxectivo achegar a banda larga aos cidadáns, organismos públicos e
tecido empresarial galego, con especial atención ás zonas máis desfavorecidas e
illadas.
Neste senso, a secretaria xeral de
Modernización e Innovación Tecnolóxica, Mar Pereira, anunciou que “xa están en marcha máis da metade das
actuacións previstas para o despregamento de infraestruturas de
telecomunicacións en Galicia”.