A SCIE e a Fundación BBVA premian a Torusware e aos titulados da FIC Adrián Pérez e Daniel Valcarce
venres, 19 de novembro do 2021
- Desde a esquerda, Adrián Pérez Diéguez, Juan Touriño Domínguez, Salvador Naya, Guillermo López Taboada e Daniel Valcarce Silva no acto de entrega dos premios
A
SCIE (Sociedad Científica Informática de España) e a Fundación
BBVA entregaron este 18 de novembro en Madrid os Premios de
Investigación que promoven cada ano e que desta volta saldouse cunha
celebración por partida dupla, xa que houbo que entregar os
recoñecementos da edición do ano 2020, aprazada pola pandemia, e os
deste ano en curso. Na
edición de 2020, a SCIE e a Fundación BBVA recoñeceron á empresa
galega Torusware, spin-off participada pola UDC e
impulsada por investigadores do Centro de Investigación TIC, o
CITIC.
Fixérono
cun dos Premios Nacionais de Informática, o Premio Ramón Llull, que
foi dar a Torusware “pola súa actividade no ámbito da computación
de altas prestacións e a súa aplicación ao procesamento de grandes
volumes de datos, o seu dinamismo e aposta pola I+D+i e polo seu
impacto nacional e internacional”. Os profesores da Facultade de
Informática da Universidade da Coruña, Ramón Doallo Biempica, Juan
Touriño Domínguez e Guillermo López Taboada son os promotores da
empresa Torusware.
Software
ultrarrápido
Torus
Software Solutions é unha empresa de solucións de software de
comunicacións ultrarrápido que permite acelerar aplicacións en
contornas en que o rendemento é crítico, en especial nos eidos
financeiros, de telecomunicacións e de enerxía. Torus é unha
Empresa de Base Tecnolóxica, recoñecida como tal pola Universidade
da Coruña en marzo de 2013. Está participada pola UDC e a Fundación
Barrié, así como por investigadores do Grupo de Arquitectura de
Computadores da UDC, con sede no CITIC. É o resultado das
investigacións levadas a cabo polos promotores no campo das
comunicacións de altas prestacións, o estreito apoio da OTRI da UDC
e o financiamento recibido pola Fundación Barrié a través do Fondo
de Investimento Ciencia, mecanismo creado para axudar á posta en
valor e comercialización de tecnoloxías xeradas nas universidades e
centros de investigación galegos.
Segundo
destacaron dende o xurado, Torus aposta firmemente pola I+D e a súa
aplicación nos sectores máis competitivos, así como pola
valorización comercial de tecnoloxías disruptivas mediante a súa
transformación en produtos únicos. Torus está comprometida co
progreso económico e social de Galicia, tendendo pontes entre o
mundo académico e o empresarial, para o que colabora intensamente
coa OTRI da Universidade da Coruña e o CITIC.
Máis
premios
Ademais,
na cerimonia deste 18 de novembro, á que asistiu o vicerreitor de
Política Científica, Investigación e Transferencia, Salvador Naya,
recibiron o seu galardón os titulados pola Facultade de Informática
da UDC, Adrián Pérez Diéguez e Daniel Valcarce Silva, distinguidos
cos Premios Investigadores Novos.
Adrián
Pérez Diéguez, responsábel de mercadotecnia dixital en Zara.com
(Inditex), foi premiado “polas súas contribucións á computación
de altas prestacións (HPC) que permiten procesar grandes volumes de
datos (Big Data) mediante a adaptación de algoritmos para a
súa execución en arquitecturas heteroxéneas”.
Pola
súa banda, Daniel Valcarce Silva, enxeñeiro de software en Google,
foi recoñecido “polas súas contribucións no eido da recuperación
de información e os sistemas de recomendación, que se reflicten nas
súas publicacións de primeiro nivel, e que o levaron a formar parte
dun equipo internacional que traballa na mellora de asistentes
persoais utilizando técnicas de linguaxe natural e aprendizaxe
automática”.
O
xurado desa edición estivo presidido por Antonio Bahamonde,
catedrático de Ciencias da Computación e Intelixencia Artificial na
Universidad de Oviedo, e presidente da SCIE; e integrado por Amparo
Alonso Betanzos, catedrática de Ciencias da Computación e
Intelixencia Artificial na Universidade da Coruña, e presidenta da
Asociación Española para la Inteligencia Artificial (AEPIA); Rosa
María Badía, líder do grupo Workflows and Distributed Computing do
Barcelona Supercomputing Center-Centro Nacional de Supercomputación;
Inmaculada García Fernández, catedrática de Arquitectura e
Tecnoloxía de Computadores na Universidad de Málaga e presidenta da
Sociedad de Arquitectura y Tecnología de Computadores (SARTECO);
Manuel Hermenegildo, director científico do IMDEA Software
Institute; Juan Hernández, catedrático de Linguaxes e Sistemas
Informáticos na Universidad de Extremadura; Mario Piattini,
catedrático de Linguaxes e Sistemas Informáticos na Universidad de
Castilla La Mancha; Francisco Quiles, catedrático de Arquitectura e
Tecnoloxía de Computadores da Universidad de Castilla-La Mancha; e
Alicia Troncoso, catedrática de Linguaxes e Sistemas Informáticos
da Escola Politécnica Superior da Universidad Pablo de Olavide.