A Rede acode ao rescate tras as explosións de Boston

Con Google Person Finder podemos obter información sobre persoas que puideron verse afectadas polas explosións de Boston

Tras as explosións durante a maratón de Boston de onte, e ante a preocupación de moita xente para saber o estado de familiares e amigos, dende Google repetiron o xa habitual dispositivo de localización de persoas que estrearan no terremoto de Haití en 2010, de xeito que durante estes días está activo o Google Person Finder para localizar á xente que puidera ter desaparecido durante o rebumbio de onte, facilitando tanto a busca de persoas como a publicación de información sobre participantes na maratón e vítimas das explosións para que os seus coñecidos poidan ser se faleceron, están feridos ou non foron afectados polos incidentes.
Esta plataforma en liña conta actualmente con 5.100 rexistros, e complementa unha iniciativa semellante da Cruz Vermella chamada Safe & Well (Sano y Salvo). Temos así que a Internet convértese nunha fonte de información de grande utilidade ante catástrofes, como pasou durante a xornada de onte, onde plataformas como Twitter facilitaron información puntual sobre as explosións cunha axilidade moito maior á dos medios de comunicación tradicionais. De feito, o propio Departamento de Policía de Boston está a empregar Twitter para dar conta das novidades sobre o incidente, aproveitando esta canle para informar a cidadáns e a afectados.