A Rede CeMIT pon en marcha novos cursos de alfabetización dixital para os colectivos con máis necesidades
luns, 26 de marzo do 2012
- Imaxe da Aula CeMIT da Cañiza
A Rede de Centros para a Modernización e
Inclusión Tecnolóxica da Xunta de Galicia, CeMIT, vén de por a andar, no
marco do seu Plan de Formación 2012, catro novos cursos de alfabetización dixital
dirixidos aos colectivos con máis necesidades de formación neste eido no país,
como son as persoas maiores, a infancia, as persoas desempregadas e os
empresarios e empresarias, que obterán deste xeito os coñecementos necesarios
para irse incorporando paseniño á Sociedade da Información.
Falamos de catro cursos de formación dixital básica que se impartirán nalgunhas
das 98 aulas que a Rede CeMIT ten espalladas por toda Galicia. O primeiro deles
é o de Iniciación á informática, que
xa se viña impartindo e que agora terá
dúas edicións específicas, unha para persoas maiores e outra para nenos,
adaptando os seus contidos ás necesidades pedagóxicas de cada un destes
colectivos.
Outro curso que se vai impartir desta volta nas distintas aulas CeMIT é o
curso Google Apps, que lle mostrará
tanto á cidadanía en xeral como aos autónomos e empresarios as posibilidades
que ofrecen as aplicacións deste servizo proporcionado de balde por Google.
Por outra banda, dirixido máis concretamente ao colectivo de persoas
desempregadas, o Plan de Formación da Rede incorpora ao seu temario o curso Elabora o teu CV, co que se pretende
axudar ás persoas que o precisen a sacarlle o máximo proveito ao seu curriculum vitae botando man das
ferramentas tecnolóxicas.
Tamén está previsto que os responsables da Rede CeMIT celebren nas
vindeiras semanas outros 4 novos cursos presenciais cos que promover o uso das
aplicacións ofimáticas entre a cidadanía, formando aos usuarios interesados en
ferramentas como os procesadores de texto, as follas de cálculo, as bases de
datos... a nivel usuario.
Por último, cabe salientar a celebración dun curso de Redes sociais dirixido especificamente ás persoas maiores, que se
organiza para mellorar as características cognitivas e metodolóxicas deste colectivo.
Teleformación
Por outra banda, e segundo o previsto no devandito Plan de Formación 2012, a
Rede CeMIT tamén porá en marcha novas accións formativas en liña a través do Espazo Multimedia de Aprendizaxe que se
levarán a cabo antes do vindeiro verán.
A nova plataforma comezará a súa andaina con 9 cursos de formación a
distancia, que son os que seguen: Gimp
(Edición de Imaxes); Openshot
(Edición e montaxe de vídeo); Audacity
(Montaxe de audio); Elaboración de
videotitoriais; Inkscape
(Elaboración de carteis e folletos); Mecanografía;
Abanq; Lei Orgánica de Protección de Datos; Exercita a túa memoria a través das novas tecnoloxías e Prevención
de Riscos Laborais no uso das TIC.
Segundo veñen de informar os responsables da Rede CeMIT, no último ano esta
entidade rexistrou 11.700 horas de formación en alfabetización dixital, e a
previsión para o 2012 é, “aumentar
considerablemente esta cifra ata superar as 20.000 horas de formación, que
beneficiarán a máis de 15.000 usuarios”.