A RedIRIS-NOVA multiplica por 10 a velocidade da súa rede óptica até chegar aos 100 Gbps
mércores, 9 de decembro do 2020
A
RedIRIS-NOVA, a rede óptica de alta capacidade despregada por
RedIRIS para dar servizo a centros académicos e científicos,
anunciou
que multiplicará por 10 a velocidade da súa rede óptica até
chegar aos 100 Gbps, tras habilitar e pór en marcha, con éxito,
novos equipos de última xeración. Esta iniciativa inclúe tamén as
troncais da Rede de Ciencia e Tecnoloxía de Galicia (RECETGA)
xestionadas polo Centro de Supercomputación de Galicia (CESGA).
Segundo
informaron fontes de RedIRIS, a conectividade a “moi alta
velocidade” é fundamental como infraestrutura troncal de rede e
para dar o mellor servizo posíbel ás súas institucións afiliadas.
A súa composición consiste en 15.000 quilómetros de fibra óptica
e equipamento de rede, óptico e IP. O despregue inicial de
RedIRIS-NOVA, que tivo un custo de 105 millóns de euros con máis do
50% de financiamento achegado a través do Fondo Europeo de
Desenvolvemento Rexional (FEDER), supuxo en palabras da devandita
entidade estatal “un importante cambio de paradigma fronte a
versións anteriores da rede troncal nas que se procedía ao aluguer
de capacidade”. Pola contra, o novo modelo de rede, baseado en
“operar e xestionar fibra óptica propia”, permitiu “incrementar
de xeito notábel o largo de banda da rede, cun custo moi inferior, e
con moita máis axilidade á hora de aprovisionar novas canles”.
