A RAGC homenaxea a Jimena Fernández de la Vega e entrega as Medallas de Investigación
venres, 8 de outubro do 2021
A Real Academia Galega de Ciencias (RAGC) celebrou este 8 de outubro, no Pazo de Fonseca en Santiago, o acto do Día da Ciencia en Galicia. Nel homenaxeouse a Jimena Mª Francisca Emilia Fernández de la Vega y Lombán (Vegadeo-Asturias, 1895 – Santiago, 1984), pioneira da xenética médica en España como Científica Galega do ano 2021. Asemade, entregáronse as distincións da RAGC a traxectorias senlleiras en investigación para a promoción da ciencia e a tecnoloxía galegas.
O acto central
Neste
acto central participou a presidenta do Consello de Estado, María
Teresa Fernández de la Vega, sobriña da figura homenaxeada este ano
pola RAGC. Ademais, contou coas intervencións do presidente da
Academia, Juan Lema; do reitor da USC, Antonio López; e da sobriña
neta da homenaxeada, Constanza Sánchez Ferrari, que leu unhas
palabras en nome de seu pai, Wenceslao Sánchez Fernández de la Vega
–sobriño de Jimena–, que non puido asistir ao evento. Tamén se
contou coa presenza do reitor da Universidade da Coruña, Julio E.
Abalde; o vicerreitor de Organización Académica e Profesorado da
Universidade de Vigo (UVigo), Manuel Ramos Cabrer; o alcalde de
Santiago, Xosé A. Bugallo; o alcalde de Vegadeo, César Álvarez; e
a presidenta do Consello da Cultura Galega, Rosario Álvarez; así
como outras académicas e académicos da RAGC e representantes de
diversas institucións políticas e culturais galegas.
Juan
Lema agradeceu sinceramente a presenza de todas as autoridades e deu
unha benvida calorosa aos familiares de Jimena, chegados expresamente
a Santiago para esta homenaxe desde lugares tan diversos como
Arxentina ou desde distintos puntos da xeografía española. “Muller
excepcional, un modelo a imitar, como científica pero tamén como
persoa, teimuda, intelixente, valorosa, visionaria e xenerosa”, así
describiu o presidente da Academia a Jimena, protagonista da
publicación Jimena Fernández de la Vega. Un modelo de científica
adiantada ao seu tempo presentada na mañá deste 8 de outubro no
Consello da Cultura Galega.
A
exaltación da súa figura continuou coa proxección do vídeo
Jimena, científica e divulgadora, unha produción na que se
abordan cuestións persoais e familiares de Jimena e, tamén, o
aspecto científico da súa traxectoria, así como a difusión da súa
vida e obra na Revista A Ciencia en Galicia co fin de
proxectala ao conxunto da sociedade.
Redución da produción científica galega
Neste
Día da Ciencia en Galicia, Lema destacou “o labor das científicas
e científicos, sen dúbida vocacional, que realizan un traballo
dedicado, sostido no tempo e sen ter a certeza de que o seu esforzo
sexa válido para resolver problemas específicos, para o que
destacou que cómpre o apoio da sociedade. O motor da súa actividade
é a procura do coñecemento. A arela por descubrir o descoñecido, a
curiosidade insaciable, pretendendo contribuír, nun traballo
colectivo e solidario, ao avance da humanidade”.
A
Academia aproveitou tamén o acto para facer público un informe
comparado, incluído na Revista A Ciencia en Galicia da RAGC,
sobre a evolución da produción científica galega no marco das
Comunidades Autónomas españolas nos últimos dez anos. Lema apuntou
ao respecto que “con este estudo compróbase o avance cualitativo e
cuantitativo das universidades galegas, pero tamén que a velocidade
do proceso non é suficiente para manter o ritmo marcado polas
comunidades máis activas. A contribución de Galicia no seu conxunto
e das universidades galegas en particular vai, co tempo, descendendo
paseniña pero continuamente, nunha dinámica diverxente con respecto
ao conxunto español”. E engadiu: “Galicia risca o perigo
inmediato de que ningunha das súas universidades, que xeran máis do
90% da produción científica galega, se manteña no selecto cadro
das universidades máis dinámicas”.
Pola
súa banda, Anxo Carracedo ofreceu unha conferencia titulada Jimena
Fernández de la Vega, pioneira da xenética clínica na que
destacou a valentía de Jimena para enfrontarse a un mundo que naquel
momento era todo homes. Carracedo sinalou que Jimena conseguiu varias
bolsas para saír fóra de España onde investigou cos mellores da
época.
Pola
súa parte, María Teresa Fernández de la Vega impartiu unha segunda
conferencia titulada La tenacidad de una científica humanista.
Relatou que Jimena naceu no seo dunha familia cun gran ambiente de
estudo, de promover a intelixencia e o coñecemento. Segundo narrou,
esa aura familiar levou a súas tías, as xemelgas Jimena e Elisa, a
querer ser médicas nuns anos nos que as mulleres non facían
carreira. Pero coa axuda do seu pai, que tamén era médico, María
Teresa explicou como foron a estudar medicina á mellor facultade do
momento, a de Santiago, e enfrontar todos as dificultades coas que se
atoparon.
Distinción de traxectorias senlleiras en investigación para a promoción da ciencia e a tecnoloxía galegas
No
acto entregáronse tamén as cinco Medallas de Investigación de
Galicia que concede a RAGC na súa terceira edición.
Carmen
Álvarez Lorenzo (Santiago de Compostela, 1970) recibe a medalla
Ánxeles Alvariño González, da sección de Bioloxía e Ciencias da
Saúde. É catedrática de Farmacia e Tecnoloxía Farmacéutica na
USC. É académica numeraria da Real Academia de Farmacia de Galicia
e Fellow do American Institute for Medical and Biological Engineering
(AIMBE).
A
medalla Domingo García-Sabell Rivas, da sección de Ciencias
Económicas e Sociais da RAGC, destaca a traxectoria de Carlos
Hervés Beloso (Marín, 1953), catedrático desde 1989 que exerce
como docente e investigador desde 1975, ano no que se licenciou en
Ciencias Matemáticas na USC con premio extraordinario.
O
enxeñeiro de telecomunicacións Luis Castedo Ribas (Santiago
de Compostela, 1966) foi o elixido pola sección de Ciencias Técnicas
para recibir a medalla Isidro Parga Pondal. É catedrático da UDC á
que se incorporou en 1994 tras obter un ano antes o título de Doutor
Enxeñeiro de Telecomunicación pola Universidade Politécnica de
Madrid. É coautor de máis de 300 artigos en revistas e congresos
internacionais de referencia en enxeñaría de comunicacións sen
fíos. Dirixiu 16 tese de doutoramento. É coordinador do grupo de
investigación en Tecnoloxía Electrónica e Comunicacións co que
desenvolveu máis de 50 proxectos de investigación de financiamento
público e asinado máis de 30 contratos de transferencia de
tecnoloxía con empresas.
A
medalla Enrique Vidal Abascal, da sección de Matemáticas, Física e
Ciencias da Computación, correspóndelle a Manuel Eulogio Ladra
González (A Coruña, 1956). É catedrático de Álxebra na USC
e socio da RSME. Con 43 anos de actividade docente, Manuel Ladra
desenvolveu toda a súa actividade académica, profesional e
investigadora na USC. Dirixiu 15 teses de doutoramento e actualmente
dirixe outras dúas.
Pola
súa banda, María Antonia Señarís Rodríguez (Santiago de
Compostela, 1965) recibe a medalla Antonio Casares Rodríguez, da
sección de Química e Xeoloxía. É catedrática de Química
Inorgánica da UDC, onde desenvolveu a maior parte da núa carreira.