A RAGC e GAIN distinguen o máis destacado do ano en transferencia tecnolóxica galega
mércores, 28 de novembro do 2018
Este
27 de novembro a Real Academia Galega de Ciencias (RAGC) e maila
Axencia Galega de Innovación (GAIN) recoñeceron con galardóns o
traballo ben feito en materia de achados científicos e tecnolóxicos
galegos e, tamén, o labor ben resolto en materia de construción de
pontes entre os ditos achados e o tecido empresarial. Estamos
a falar da cuarta edición dos Premios á Transferencia de
Tecnoloxía, dirixidos a fomentar que o coñecemento avanzado que
abrolla dos centros tecnolóxicos e das nosas comunidades científicas
colla corpo como solucións e servizos concretos de mercado, en
beneficio do tecido económico galego e da cidadanía.
Recibiron
os recoñecementos a empresa lucense Insitu (modalidade para PEME) e
o equipo da USC dirixido por Francisco Rivadulla (modalidade de
investigación aplicada). Amais, houbo unha mención especial para o
proxecto Pescaenverde do Departamento de Enxeñaría Química
da USC.
Na
cita participaron Miguel Ángel Ríos, presidente da RAGC, a
directora da Axencia Galega de Innovación, Patricia Argerey Vilar, o
director da Axencia Galega de Calidade Alimentaria, Manuel Rodríguez.
o reitor da Universidade de Santiago de Compostela (USC), Antonio
López; a vicerreitora de Comunicación e Relacións Institucionais
da Universidade de Vigo (Uvigo), Mónica Valderrama;a xerente da
Axencia Galega de Coñecemento en Saúde (ACIS), Beatriz Allegue; o
decano da Facultade de Medicina, Julián Álvarez; a decana da
Facultade de Farmacia, Isabel Sández e o presidente da Academia
Xacobea, Xesús Palmou.
Como
avanzamos, o premio ao mellor traballo desenvolvido por un grupo de
investigación aplicada, dotado con 6.000 euros netos e unha axuda de
4.000 euros para a formación dun dos investigadores, recaeu na USC:
máis polo miúdo, no Centro Singular de Investigación en Química
Biolóxica e Materiais Moleculares (CiQUS) e no Departamento de
Química Física da USC. O proxecto liderado polos doutores Francisco
Rivadulla e Víctor Leborán consiste no desenvolvemento dun novo
sensor con aplicacións no desenvolvemento de novos fármacos e
produtos biomédicos.
Nesta
mesma categoría, o xurado dos galardóns decidiu outorgar unha
mención especial ao proxecto Pescaenverde, que pon en
xogo (neste intre concreto no que estamos a vivir) a que sería a
única ecoetiqueta específica dos produtos do mar que informa ao
consumidor sobre a pegada no cambio climático que supón cada peza
de peixe á venda. Recolleron o recoñecemento Gumersindo Feijoo,
María Teresa Moreira e Pedro Villanueva Rey, do Departamento de
Enxeñería Química da USC.
Polo
que atinxe ao premio da categoría de PEME foi recollido por Pedro
Arias, co-fundador de Ingeniería Insitu, a empresa galardoada,
nacida do Grupo de Investigación en Xeotecnoloxías Aplicadas
(GeoTech) da Uvigo e con sede actual en Lugo. O galardón, dotado con
12.000 euros, recoñece o sistema desenvolvido por Insitu para
“permitirlles a empresas e administracións públicas inspeccionar,
explotar e xestionar estradas, liñas de ferrocarril e aeroportos
desde a oficina, a partir dos datos obtidos con múltiples sensores e
que lle mostran ao usuario representacións 3D e imaxes sobre o
estado da vía, a visibilidade nun determinado momento, etc”.
O
presidente da Real Academia Galega de Ciencias (RAGC), Miguel Ángel
Ríos, afirmou no transcurso do acto que “a transferencia de
tecnoloxía ao sector produtivo desde as institucións e centros onde
se produce a ciencia parece ser a vía máis razoábel para alimentar
a competitividade das empresas”.
Parabéns
de GAIN
No
tocante aos premiados, Patricia Argerey salientou que materializan á
perfección o valor da ciencia ao servizo da eficiencia baseada na
tecnoloxía, do progreso económico sustentábel e da mellora da
calidade de vida. Respecto da empresa galardoada co premio ao mellor
caso de éxito empresarial de transferencia de tecnoloxía para PEME,
a lucense Ingeniería Insitu, destacou “o potencial innovador das
provincias do interior de Galicia”. Amais, felicitou á enxeñeira
cuxa tese de doutoramento foi o xerme do proxecto e primeira tese das
universidades galegas premiada coa mención industrial, María
Varela, actual responsábel de innovación da empresa, e subliñou “a
importancia de contar con referentes coma ela para fomentar as
vocacións científicas entre as rapazas”.
En
canto ao grupo de investigación galardoado co premio ao mellor
traballo de investigación aplicada, recollido polo equipo da
Universidade de Santiago de Compostela dirixido polo profesor
Francisco Rivadulla por un proxecto de aplicación ao campo da saúde,
Argerey destacou que “se trata dunha nova demostración de forza do
sector biotecnolóxico galego”.
Por
último, fixo referencia ao traballo merecedor dunha mención
especial, o proxecto Pescaenverde do Departamento de Enxeñaría
Química da USC, por supor, sinalou, “o nacemento en Galicia da
primeira ecoetiqueta específica dos produtos do mar que cuantifica o
impacto no cambio climático”.