A RAGC convoca os Premios Ernesto Viéitez Cortizo, que recoñecen a investigación galega de maior nivel
mércores, 20 de decembro do 2023
A
Real Academia Galega de Ciencias (RAGC) convoca os Premios de
Investigación Ernesto Viéitez Cortizo 2023. Estas distincións
están destinadas a recoñecer a investigación de maior nivel
desenvolvida en Galicia nas áreas de coñecemento de matemáticas,
física e da ciencias da computación, química e xeoloxía, bioloxía
e ciencias da saúde, ciencias técnicas ou ciencias económicas e
sociais, todas elas integradas na RAGC.
O
premio, que este ano cumpre a súa trixésimo terceira edición, está
dotado con 6.000 euros e un diploma acreditativo. O prazo de
presentación de candidaturas estará aberto ata o vindeiro 15 de
febreiro de 2024. Ademais, poderán concederse ata dúas mencións
especiais. A participación tramitarase de xeito telemático a través
dun formulario electrónico dispoñíbel na
páxina web da Real Academia Galega de Ciencias.
Segundo
as bases da convocatoria, poderán concorrer todas as persoas
investigadoras que presenten un traballo realizado total ou
parcialmente en universidades ou centros de investigación de
Galicia. As propostas, explica a RAGC, “tratarán sobre temas ou
aspectos relacionados coas áreas temáticas xa mencionadas das
seccións da Academia”. Polo menos unha ou un dos autores deberá
ser doutor. O traballo debe estar xa publicado ou aceptado para a súa
publicación con posterioridade ao 1 de xaneiro de 2022. Non poderán
presentarse propostas que estean concorrendo a outros certames ata o
acto público de entrega de galardóns.
Só
se poderá presentar unha única candidatura por solicitante. O
xurado estará composto por sete membros, cinco deles pertencentes a
cada unha das seccións da Real Academia Galega de Ciencias, xunto ao
presidente e a secretaria da institución.