A Politécnica de Lugo achega unha innovadora plataforma de teleformación para levar contidos a persoas de todo o mundo
luns, 2 de febreiro do 2015
- Escola Politécnica Superior de Lugo
Formación para todo o mundo e de xeito doado e
flexíbel. Esta
é base dunha nova plataforma telepresencial apoiada en software
libre que se vén de pór en marcha dende o Campus de Lugo. Máis
polo miúdo dende o Laboratorio do Territorio (LaboraTe) da USC
(grupo de investigación con sede na Escola Politécnica Superior), e
dende o Sistema de Información Territorial (SIT, un servizo tamén
vinculado á Escola Politécnica Superior e con sede no edificio
Cactus). A súa aposta conxunta pola innovación tecnolóxica
aplicada á docencia para favorecer a transferencia de coñecemento
colleu corpo a través da dita plataforma de código aberto, idónea
para videoconferencias e baseada na aplicación BigBlueButton.
A tecnoloxía en cuestión comezou a funcionar este
curso 2014-2015 nas instalacións do SIT, permitindo participar nunha
mesma actividade formativa a estudantes e docentes que asisten de
xeito presencial á aula na que se imparten os contidos con outras
persoas conectadas virtualmente en tempo real, “pero coas mesmas
posibilidades de interlocución”, informa a Universidade de
Santiago, que tamén engade que esta experiencia piloto no ensino
universitario galego “cobra especial relevancia ao tratarse dunha
iniciativa implantada na sede universitaria luguesa, un dos campus
obrigados pola Xunta a formular plans de viabilidade para varias das
titulacións que rexistraron un baixo número de estudantes nos
últimos anos, e tamén denota a súa capacidade de adaptación ao
novo escenario que emerxe no ensino superior”.
Por certo que a través da plataforma de
teleformación estanse a organizar xa parte das actividades
formativas impulsadas polo SIT, amais da quinta edición do Máster
en Xestión Sustentable da Terra e do Territorio, coordinado polos
investigadores do LaboraTe. Segundo informan os responsábeis deste
desenvolvemento, “as vantaxes da aplicación son moitas e todas
favorecen o acceso e a difusión de coñecementos, tanto entre
estudantes como entre docentes”.
Nun plano máis concreto, a ferramenta facilita a
inscrición de alumnado ou a participación puntual de colaboradores
e expertos en calquera das materias abordadas obviando as limitacións
xeográficas. A maiores, contribúe “a manter o carácter
transversal e multidisciplinar que debe imperar en titulacións
abertas a estudantes de distintas nacionalidades e procedentes de
diferentes titulacións de acceso”, engaden os impulsores da
plataforma.
Como dixemos, a pasarela telepresencial do SIT
baséase na aplicación BigBlueButton,
unha nova plataforma de código libre, especificamente deseñada para
actividades de aprendizaxe a distancia (elearning). O sistema
reúne nunha mesma interface vídeo e son, mensaxería instantánea e
encerado virtual, onde o profesor amosa a súa presentación ou pode
escribir e facer gráficos. “Ademais”, explican os responsábeis
do seu desenvolvemento, “ten capacidade para compartir escritorio,
polo que os alumnos presenciais e remotos poden visualizar tamén a
execución de programas ou tarefas realizadas polo poñente no seu
propio equipo, algo imprescindible no caso de exercicios de carácter
práctico”. E engaden: “A pasarela complétase cunha
infraestrutura física consistente en varios micrófonos
convencionais e unha ou dúas webcams instaladas na sala”.