A Mesa protesta en Ikea pola exclusión do galego da súa páxina web
luns, 23 de setembro do 2019
A
semana pasada, o venres, a
Mesa pola Normalización Lingüística levou a cabo unha actividade
de protesta perante as instalacións do xigante Ikea, no recinto de
Marineda City na Coruña. O motivo foi o desleixo da compañía
sueca polo galego na súa
páxina web, que como poderemos comprobar, achégasenos en
castelán e catalán, pero non galego.
Isto
tamén é aplicábel á nova liña de catálogos, cuxos exemplares
achegados na nosa lingua presentan “moita dificultade” para seren
atopados, segundo informa A Mesa. Na actividade reivindicativa da
Mesa podía lerse a pancarta coa seguinte petición: “Vi vill ha
galiciska på Ikea” (“Queremos galego en Ikea”).
A
Mesa lembrou que aínda que o catálogo web de Ikea si que está
dispoñíbel en galego, malia os atrancos para chegar aos usuarios, a
web só dispón versión en castelán, inglés e catalán. “Ikea
esqueceu o galego e non resposta os correos que enviamos para llo
lembrar!”, denuncia a entidade, que convidou á comunidade
internauta galega a enviar un correo a so.arcolopd.es@ikea.com
reclamando a web en galego ou a presentar unha queixa en atención ao
cliente e enviar copia desta a linhadogalego@amesa.gal, para poder
facer seguimento das queixas presentadas e aumentar a presión.