A Mesa felicita ao Goberno e a ERC por querer blindar a igualdade das linguas na Lei do Audiovisual
venres, 29 de outubro do 2021
A
Mesa pola Normalización Lingüística segue adiante coa súa loita
para reivindicar os contidos en galego nas canles e plataformas
públicas estatais, unha loita que recibiu este 29 de outubro un novo
e importante apoio: o
acordo asinado polo Goberno español e a ERC destinado a blindar a
igualdade das distintas linguas do Estado na Lei do Audiovisual.
Acerca desta importante novidade, A Mesa lembrou que as forzas
políticas galegas amosaron en múltiples ocasións a súa
unanimidade neste sentido.
“Onte
mesmo”, recorda o presidente da Mesa, Marcos Maceira, “o Concello
de Santiago aprobou por unanimidade a moción Xabarín 2.0. pola
defensa do galego na Lei do Audiovisual que se está a debater no
Estado e axiña farán o mesmo o resto dos Concellos do país, como
xa fixeron tamén todas as forzas políticas do Parlamento Galego en
dúas ocasións e como recordou o BNG no Congreso en datas recentes”.
A entidade de defensa da lingua espera, polo tanto, que o galego
reciba un tratamento igualitario nas cotas que se estabelezan.