A Igrexa de Finlandia afianza as bases dun sistema de doazóns dos fieis por SMS

As novas tecnoloxías da información, do mesmo xeito que todo o restante paquete de evolución humana, teñen (que lle van facer!) certa tendencia a facernos a vida máis doada. En certa maneira, as ferramentas dixitais están ceibas de culpa: se hai alguén que a teña somos precisamente nós. Non nos enganemos: se hai Rede, móbiles e robótica é, entre outras razóns de carácter máis digno e altruísta, para permitirnos pasar máis tempo sentados no sofá. Disto, de aplicar ao extremo a filosofía de non mover un pelo mentres haxa aparellos que o fagan por nós é do que trata unha curiosa iniciativa persoal posta en marcha en Finlandia co obxectivo de afianzar, pola vía das novas tecnoloxías, as canles de comunicación que tradicionalmente uniron á Igrexa cos fregueses, sobre todo aquelas que máis teñen que ver co fluxo de axudas dende estes a aquela. Segundo sinala estes días Reuters, a proposta vén da man do deán da Catedral Oulu (na imaxe), Matti Pikkarainen, e en liñas xerais consiste en sentar as bases para permitirlles aos fieis facer doazóns de esmolas a través de mensaxes de texto e sen ter que asistir aos oficios relixiosos.
A idea, en contra do que se pode pensar, non é a de permitir o absentismo litúrxico sempre e cando haxa doazóns de por medio, senón a de modernizar a propia Igrexa a través de novos espazos de diálogo. O primeiro movemento da dita institución é buscar saídas a un atranco legal: segundo as leis do país nórdico, a Igrexa non pode recadar fondos a través destes medios. Neste intre, de feito, o deán atópase por así dicilo nunha fase avanzada do labor de mediación entre a Igrexa, institución non sempre favorable a ollar cara a adiante (por moito que se trate da Luterana Evanxélica, a de maior presenza no país e responsable da proposta) e o Goberno do país, que a petición de Pikkarainen está estudar a comenencia de mudar ou non a lei. De chegar a bo porto, a iniciativa estaría dirixida non só a fortalecer a contía das axudas que recibe a Igrexa, senón que tamén iría encamiñada a facer o máis doada posible a contribución dos fieis, que polo ritmo da vida moderna non sempre poden acudir aos oficios e facelo en primeira persoa.