A Fundación TIC forma nas vantaxes de Internet aos maiores de Castro de Rei
xoves, 28 de xuño do 2018
A
Fundación TIC da Deputación
de Lugo imparte esta semana en Castro de Rei un dos 12 cursos cos
que familiariza, neste segundo trimestre de 2018, ás persoas maiores
do rural coas vantaxes e utilidades das novas tecnoloxías da
información. Con
motivo do desenvolvemento deste obradoiro en Castro de Rei, o
deputado de Turismo, Eduardo Vidal Baamonde, mantivo este mércores
un encontro cos participantes na actividade coa que, desta volta,
introdúcense de cheo no mundo de Internet. O curso é de balde e
celébrase na Escola Unitaria Ponte de Outeiro.
Vidal
Baamonde dixo que “este é un dos varios e exitosos cursos que
dende a Deputación de Lugo, por medio da Fundación TIC, levamos a
cabo por toda a provincia para axudar aos nosos maiores a que se
poñan ao día coas novas tecnoloxías”. E engadiu, facendo
referencia ao potencial das ferramentas dixitais para mellorar a
calidade de vida das persoas de idade: “Pensamos que a actividade é
un estímulo para usar as novas tecnoloxías, facendo conscientes aos
participantes das utilidades e dos beneficios que estas lles poden
proporcionar”. O deputado salientou que este tipo de iniciativas
“favorece a súa autonomía persoal, a adquisición de habilidades
e a mellora e preservación das súas capacidades cognitivas e
funcionais. O que buscamos con estes cursos é que todos os nosos
veciños do rural teñan as mesmas posibilidades que os maiores das
zonas máis urbanas”.
O
obradoiro insírese no programa de alfabetización tecnolóxica da
entidade lucense para o rural deste segundo trimestre de 2018. Os
días pasados as actividades chegaron a concellos como Navia de
Suarna, Foz, Xermade, Ribeira de Piquín, Baleira, Fonsagrada,
Monforte e Pantón, amais da comarca da Mariña. En todas as citas
estase a conseguir un alto nivel de participación, o que demostra,
en palabras da Deputación, “o interese que hai por parte dos
maiores sobre a utilidade das novas tecnoloxías como ferramenta para
mellorar a súa calidade de vida”.
O
cursos na provincia son sobre o uso do móbil e Internet, as materias
máis demandadas polos usuarios do InLugo da TIC.
En
total, este segundo trimestre achéganse 1.085 prazas nas 81 accións
formativas que imparte a entidade, tanto na sede de seu como na
provincia. Segundo explica o Goberno provincial, esta cifra supón un
incremento do 60% con respecto á tempada anterior.