A Fundación TIC envórcase cunha campaña para que ningún neno fique sen agasallo no Nadal
venres, 6 de novembro do 2015
A Fundación TIC
(Deputación de Lugo) deu a coñecer unha nova medida de seu a prol
das organización sen arela de lucro da provincia. Máis
polo miúdo, trátase dunha colaboración co colectivo Bonhomía,
arestora mergullado no desenvolvemento da campaña Ningunha Árbore
Baleira, encamiñada a conseguir que todas as nenas e nenos de
Lugo teñan un agasallo este Nadal. Segundo fai saber o organismo
provincial, un equipo de profesionais e bolseiros da Fundación TIC
xa gravaron varias secuencias dun anuncio publicitario, coa
participación de nenos e persoas maiores, na Praza Maior de Lugo.
Unha vez editado, Bonhomía difundirá
o spot na súa páxina web e nas redes sociais.
A colaboración da TIC
complementarase coa realización de reportaxes sobre o
desenvolvemento da campaña. A achega da Fundación é froito do
convenio que ven de asinar con Bonhomía, para promover o seu labor
de loita contra as desigualdades socioeconómicas, culturais, de
xénero ou de calquera tipo, no ámbito da nosa provincia. Na
actualidade son máis de 130 as organizacións que manteñen acordos
de colaboración coa TIC, que facilitan aos alumnos e bolseiros da
Escola de Imaxe e Son prácticas profesionais en escenarios reais, a
prol da súa inserción no mercado laboral.
