A Fundación TIC de Lugo abre a tempada de visitas para os centros de ensino
venres, 23 de outubro do 2015
A Fundación TIC (Deputación de Lugo) vén de abrir
oficialmente a cuarta tempada de visitas divulgativas ás súas
instalacións. Estas visitas teñen por finalidade achegar as
vantaxes e usos das novas tecnoloxías ao alumnado de Primaria e
Secundaria, ademais de amosarlles aos escolares en que consiste o
labor desenvolvido pola Fundación. Por outra banda, nas sesións de
acollida tamén se lles informa dos estudos que importante a Escola
de Imaxe e Son, en palabras da Deputación “o único centro público
na provincia de ensino superior do eido audiovisual”. O
primeiro grupo que participou nestas xornadas de portas abertas foi o
CPEI Doutor López Suárez, de Escairón (O Saviñao). Acudiron
38 alumnos de primeiro e terceiro da ESO, acompañados de tres
profesores do centro.
Segundo informa o organismo provincial, as alumnas e
alumnos tiveron a oportunidade de percorrer as instalacións da
Fundación TIC e presentar, tamén, o primeiro boletín informativo
audiovisual (Ticodiario) da tempada, con información sobre os
concellos dos centros participantes nas visitas. Nun plano máis
xeral, os escolares puideron dar conta do labor cotián dun estudo de
televisión (produción, edición, realización e postprodución de
pezas audiovisuais) e recibiron información sobre as especialidades
de Realización e Produción que imparte a EIS.
Lembrar que durante o curso 2014-2015 preto de 1.400
alumnos centros de Primaria e Secundaria da provincia, divididos en
53 grupos, participaron nas visitas didácticas ás instalacións da
Fundación. Dende que comezaron os Ticodiarios, en febreiro de
2013, houbo un total de 103 visitas. Os centros interesados en
participar na nova tempada, poden apuntarse chamando ao número de
teléfono 982 206 225.