A Fundación Jacobea comparte na súa nova web as experiencias da comunidade internacional de peregrinos
martes, 27 de novembro do 2018
A
Fundación Jacobea, pertencente ao Grupo Carrís, vén de presentar a
súa nova páxina web, dispoñíbel xa en www.fundacionjacobea.org,
destinada a informar polo miúdo dos valores ligados ás rutas de
peregrinación, a impulsar do Camiño de Santiago e os seus
itinerarios e, tamén, a subministrar coñecemento útil para aos
viaxeiros.
Trátase
dun ambicioso site, moi visual ao tempo que moi informativo,
que se ofrece en tres idiomas (galego, castelán e inglés) e que
subministra coñecemento directo e actualizado sobre a dita fundación
e os seus proxectos, e sobre recursos postos a disposición da
comunidade de peregrinos. Asemade, fornece aos internautas de
completa información sobre o Camiño de Santiago (preparación,
rutas, localidades xacobeas, que visitar, historia e tradición, viño
e gastronomía).
A
posta en marcha da web e a súa presentación insírese no programa
de actividades divulgativas do Camiño que está a organizar a
fundación este mes de novembro, un programa de accións que difunde
o espírito de peregrinación xacobea ao tempo que pon o foco nas
posibilidades de interacción do Camiño coas novas tecnoloxías.
Destes obxectivos abrolla o proxecto Memoria da peregrinación do
século XXI, unha iniciativa que conta con dúas
ferramentas dixitais: a páxina web da que estamos a falar e máis
unha revista dixital. Ambos recursos teñen obxectivos análogos:
permitir aos peregrinos compartiren as súas vivencias, coñecer as
localidades polas que transita o Camiño e pór en alza os valores
que perseguen tanto a fundación como a propia peregrinación.
Volvendo
á web e os seus detalles principais, un dos seus elementos centrais
é o blog adicado a recoller e mostrar testemuños e experiencias dos
peregrinos. A este respecto, a Fundación Xacobea considera “que as
vivencias dos peregrinos e a posibilidade de compartilas entre eles
constitúen o aspecto esencial da peregrinación, a alma do Camiño”,
e por iso quere dedicarlles “un espazo privilexiado, novo e
necesario”, que nace “cunha clara vocación internacional”.
As
historias e testemuños de peregrinos serán recollidas tanto en
formato online como de forma directa a través de entrevistas
en persoa cos peregrinos. “Trátase dunha ferramenta innovadora e
de gran importancia para a promoción do Camiño de Santiago”,
sinala a entidade responsábel da súa posta en marcha, que engade
que a arela que alenta o proxecto é “trasladar a faciana máis
humana da peregrinación ao resto do mundo: o verdadeiro espírito da
peregrinación compostelá”.