A Fonsagrada, Ribeira de Piquín e Negueira de Muñiz promoven os seus tesouros na Rede co apoio da Deputación
xoves, 11 de marzo do 2021
Os
concellos da Fonsagrada, Ribeira de Piquín e Negueira de Muñiz,
xunto coa Deputación de Lugo, presentaron este xoves 11 o portal
Terrasdeburon.es, unha
iniciativa impulsada polos tres ditos concellos co apoio dos fondos
da entidade provincial, co obxectivo de visualizar e poñer en valor
a comarca que lle dá nome á web e a súa oferta conxunta de lecer,
turismo, gastronomía, historia e cultura. Tamén
é un recurso para contribuír á recuperación do sector turístico
e hostaleiro.
“Traballar
pola promoción do territorio con proxectos coma este é importante
para apoiar aos sectores económicos máis afectados pola pandemia,
pero tamén é unha aposta de futuro para o rural porque a crise
sanitaria fixo que o turismo de natureza, de montaña, como o que
ofrece Terras de Burón, estea en alza”, subliñou José Tomé,
presidente da Deputación, na presentación da web.
No
acto, celebrado no Salón de Actos Municipal Os Chaos, participaron o
alcalde da Fonsagrada, Carlos López López; o rexedor de Ribeira de
Piquín e tamén deputado de Recursos Sostibles, Roberto Fernández
Rico, e o alcalde de Negueira de Muñiz, José Manuel Braña Pereda,
ademais da deputada de Réxime Interior, Promoción do Territorio e
Turismo, Pilar García Porto; o deputado de Promoción Económica e
Social, Pablo Rivera Capón, e representantes da Corporación
municipal da Fonsagrada e hostaleiros da zona.
Tomé
Roca felicitou aos alcaldes da Fonsagrada, Ribeira de Piquín e
Negueira de Muñiz por “esta aposta conxunta” por aproveitar o
potencial turístico dos seus concellos. “Non hai como traballar da
man para lograr obxectivos comúns máis ambiciosos dos que podemos
acadar en solitario”, subliñou Tomé, quen tamén destacou que o
proxecto da páxina web sexa unha realidade grazas aos fondos do Plan
Único da Deputación de Lugo, un instrumento de cooperación que,
ademais de garantir a transparencia e o reparto xusto dos fondos,
respecta a plena autonomía dos concellos para destinar os recursos
económicos que reciben ás medidas que consideran máis necesarias e
adecuadas para os seus municipios.
Presencia
en redes sociais
A
web terrasdeburon.es difunde a oferta, actividades de lecer,
gastronomía, historia e cultura da Fonsagrada, Ribeira de Piquín e
Negueira de Muñiz.
Ademais,
permite a promoción dos establecementos hostaleiros e turísticos da
zona, de balde para eles, e ofrece diferentes rutas de sendeirismo e
lugares emblemáticos de interese para os visitantes. Os Concellos e
a Deputación engadiron que os contidos da plataforma “estarán en
continua renovación e actualización” e apoiarase tamén nas redes
sociais para facer promoción do territorio e lanzar a zona como un
paquete turístico.