A EE de Telecomunicación forma a 30 estudantes fronte ás ciberameazas
venres, 14 de xullo do 2017
O
equipo
directivo da Escola de Enxeñaría de Telecomunicación está a
organizar a segunda edición do curso Introdución á
ciberseguridade, logo
dos éxitos colleitados pola primeira convocatoria, na que
participaron 30 estudantes. O obradoiro, de 44 horas de
duración, lévase impartindo dende o 1 de xuño e a súa docencia
continuará ata o vindeiro 20 de xullo en horario de tarde. Un dos
seus obxectivos, en palabras do director da cita Escola, Íñigo
Cuiñas, é dar resposta a un interese que non para de medrar: o do
profesorado e alumnado acerca das metodoloxías máis acaídas para
atallar a problemática da seguridade dixital. Dito doutra maneira:
cada ano que pasa medra a cantidade de xente que quere estar
preparada fronte a un ciberataque e no curso, precisamente,
apréndeselles a estalo.
Nesta
edición ocupáronse 29 prazas das 30 ofertadas. O alumnado é
principalmente estudante ou graduado nas diferentes titulacións de
Enxeñaría de Telecomunicación e de Informática, aínda que tamén
hai participantes doutras titulacións, así como profesionais en
exercicio con outras orixes en canto a titulación pero con interese
nos contidos e nas metodoloxías da ciberseguridade. Como novidades
este ano, Cuiñas salienta a incorporación dun módulo de seguridade
no software, impartido por un experto de Deloitte.
O
obadoiro está sendo impartido por dez profesionais que se dedican á
protección TIC en empresas galegas e do resto de España e cada un
deles está a desenvolver diferentes aspectos relacionados con este
sector.
O
primeiro módulo é unha introdución á ciberseguridade, na que se
dan a coñecer e entender os principais conceptos e termos empregados
neste eido dende o punto de vista da mercadotecnia. O segundo módulo
aborda o goberno da seguridade da información, no que hai que
destacar a eficiencia por parte dos profesionais dos recursos
dispoñíbeis para reducir os riscos na seguridade para os negocios.
Na terceira parte do curso reflexiónase sobre a arquitectura da
seguridade e as tecnoloxías que se empregan para a mesma. O seguinte
módulo versa sobre os métodos para blindar redes e sistemas. As
principais metodoloxías de auditoría técnica, así como o ciclo de
desenvolvemento de software e o desenvolvemento seguro de
aplicacións, compoñen a seguinte parte do programa.
Posteriormente,
abórdase a xestión dos incidentes dentro da xestión dos servizos
TIC, entre os que destacan o equipo de resposta ante emerxencias
informáticas (CERT), o centro de operacións de seguridade (SOC) e
as redes de alerta temperá, ademais dos perfís profesionais que
estes requiren. As e os asistentes reflexionan tamén sobre o
desenvolvemento seguro de software e sobre os aspectos legais
relacionados coa ciberseguridade en España.