A Deputación lanza nas redes novos vídeos sobre a grandeza patrimonial de Lugo
mércores, 8 de maio do 2019
A
Deputación de Lugo segue adiante co seu obxectivo de engrandecer a
provincia e mostrala turisticamente ao mundo a través de
vídeos-reclamo nas redes sociais. As
novas contribucións, un documental e seis microvídeos para promover
o turismo dos concellos, foron presentadas hoxe polo deputado de
Turismo, Eduardo Vidal Baamonde. O novo material audiovisual
inclúese na campaña Lugo Cambia que impulsa o Executivo
provincial desde hai 2 anos.
Vidal
Baamonde subliñou que de cara á tempada de verán, o vídeo Lugo
Inédito en 7 idiomas e máis a media ducia de pezas audiovisuais
sobre os xeodestinos lucenses implican un novo chanzo no
desenvolvemento da nova campaña: un esforzo extra por “captar a
atención de máis viaxeiros nacionais e estranxeiros e atraer máis
turistas”.
Segundo
engadiu, “na provincia hai máis dunha trintena de lugares de
interese turístico que teñen o privilexio de poder etiquetarse como
únicos no mundo”. Neste senso, o vídeo Lugo Inédito
céntrase en amosar unha escolma deste lugares, unha aproximación a
enclaves de visita obrigada como a Muralla de Lugo ou As Catedrais de
Ribadeo. O material presentado hoxe proxectarase na Feira de Turismo
Expovacaciones en Bilbao, entre o 10 e 12 de maio, na que terá
presenza a Deputación cun stand de seu.
O
deputado tamén explicou que “co fin de que este audiovisual acade
unha maior proxección internacional, editouse en 7 linguas: inglés,
italiano, portugués, alemán, francés, galego, e castelán”. O
material publicarase
na canle de Youtube da área de Turismo da Deputación de Lugo.
Amais, a guía completa dos espazos de Lugo Inédito pódese
consultar na web de Turismo da Deputación
(turismo.deputacionlugo.gal)
e serve de proposta e fío condutor para coñecer toda a provincia a
través de elementos do patrimonio que a distinguen.
Vídeo
Lugo Inédito
O
novo spot Lugo Inédito contribúe á divulgación de 13
lugares de interese turístico que teñen o privilexio de poder
etiquetarse como únicos a nivel internacional: a Muralla de Lugo,
única no mundo que conserva íntegro o seu perímetro; a Praia das
Catedrais, un dos máis fermosos areais do planeta enteiro; a Serra
do Courel, referente mundial de xeoloxía e recentemente declarado
Xeoparque Mundial; A Ribeira Sacra, a maior concentración de
románico rural de Europa; Lugo, a provincia española con máis
quilómetros de Camiño de Santiago; San Pedro de Fiz de Hospital en
O Incio, única igrexa de mármore do mundo; San Martiño de
Mondoñedo, a catedral máis antiga de España; as pallozas dos
Ancares, testemuñas dunha forma de vida única; o Castro de Fazouro,
único castro marítimo escavado no Cantábrico; Santa Eulalia de
Bóveda; un dos grandes enigmas da arqueoloxía; o Souto da Retorta,
un bosque con árbores xigantes; Ribeira Sacra, un viño de heroes; e
A Fortaleza de Pambre, única fortaleza galega imbatíbel nas
Revolucións Irmandiñas.