A Deputación de Pontevedra inicia a licitación do proxecto depoGAP
venres, 14 de novembro do 2014
O
pasado 31 de outubro o
Pleno da Corporación provincial aprobou o expediente de contratación
do proxecto depoGAP xestión de activos da provincia de
Pontevedra, co que a Deputación pretende avanzar na mellora
da xestión de activos municipais. O proxecto conta cun orzamento de
6,9 millóns de euros, dos cales o 70% son achegados polos Fondos
Europeos de Desenvolvemento Rexional (FEDER). Segundo informa o
organismo que preside Rafael Louzán, trátase dun procedemento
aberto que está en fase de presentación de ofertas. Ao ser un
servizo suxeito a regulación harmonizada, o expediente de
contratación enviouse para a súa publicación no Boletín Oficial
da provincia de Pontevedra (BOPPO), no Boletín Oficial do Estado
(BOE) e no Diario Oficial da Unión Europea (DOUE). A data límite
para a presentación de ofertas é o 22 de decembro de 2.014.
Esta
iniciativa da Deputación de Pontevedra abrangue tanto a realización
dun inventario de activos de todos os concellos da provincia de
Pontevedra (salvo Pontevedra e Vigo) e da Deputación, como a
implantación dun sistema ou plataforma para a xestión deses
activos, que permita explotala e xestionala “dunha maneira
unificada” e fomente a participación e a comunicación coa
cidadanía, a través dun portal para o cidadán e unha aplicación
para dispositivos móbiles. Asemade,
levará a cabo a posta en marcha de varias probas piloto de
eficiencia enerxética, que permitan obter o coñecemento suficiente
para extrapolalo ó resto da provincia, co fin de diminuír o gasto
enerxético e ambiental como consecuencia do uso eficiente dos
activos públicos.
Estas
actuacións completaranse coa realización dun catálogo de normas,
procedementos e recomendacións que sirva de guía, tanto para os
empregados públicos coma para as empresas de servizos e obras que
traballen para os distintos concellos, para o mantemento e a
actualización dos activos inventariados.
Ademais,
deseñarase e desenvolverase un plan da xestión do cambio “necesario para mitigar as posibles
resistencias e barreiras provocadas pola posta en marcha do
proxecto”. Tentando reducir a incerteza do usuario que non sabe, por medio da comunicación, ensinando ao usuario que non pode a través da formación e a capacitación e cambiando a actitude do usuario que non quere mediante a dinamización. Desta forma, garantirase que todos os axentes implicados no proxecto asuman o cambio de forma axeitada.