A Deputación de Pontevedra estrea conta en Instagram
luns, 7 de decembro do 2015
A Deputación
de Pontevedra vén de estrear conta na rede social Instagram. O
obxectivo da entidade provincial, con esta canle comunicativa de seu,
é “transmitir de xeito visual e a través de fotografías e
infografías, os programas e as actividades que se están a levar a
cabo dende a Deputación”. A conta foi dada a coñecer pola
presidenta da entidade provincial, Carmela Silva, quen aproveitou
para facer reconto dos froitos acadados pola institución nas
restantes redes sociais nas que ten presenza: son en total 50.000
seareiros repartidos en Facebook (26.089), Twitter (22.757) e YouTube
(1.154). En palabras da presidenta, estas e outras cifras amosan ás
claras “un proceso de crecemento imparábel” no que a
comunicación social e tecnolóxica da Deputación se refire.
Carmela Silva salientou que “as comunidades e
canles 2.0 son unha ferramenta fundamental para trasladar a nosa
visión do novo goberno da Deputación, no que as portas e fiestras
abertas, a transparencia, a proximidade e a atención ás necesidades
da cidadanía son a nosa máxima”. Segundo engadiu, a través das
redes sociais a Deputación de Pontevedra pretende “establecer unha
canle de información e, ao mesmo tempo, manter unha relación
directa cos usuarios mediante mensaxes públicas e privadas que
funcionan coma un centro de atención á cidadanía”.
Na conta
da Deputación en Instagram divulgaranse, cunha frecuencia
inicial de tres a seis publicacións semanais, as actividades, os
eventos e os plans que a institución provincial está a levar a
cabo, con capturas da actividade da Deputación nos 62 concellos da
provincia. Ademais, @deputacionpontevedra incluirá contidos
relacionados co Museo de Pontevedra e compartirá imaxes doutros
usuarios de Instagram, “coa finalidade de achegar diferentes
perspectivas e puntos de vista sobre un mesmo acontecemento”.