A Deputación de Pontevedra desenvolve 41 cursos TIC en outubro

A Deputación de Pontevedra segue adiante coa súa aposta a prol da formación TIC para os integrantes do tecido produtivo da provincia, cubrindo un amplo abano de temáticas de interese para o seu día a día (dende o comercio electrónico até o uso comercial das redes sociais e dos buscadores). Deste xeito, o organismo provincial está a pór en marcha estes mes outubro un total de 41 cursos de novas tecnoloxías en seis localidades dentro do programa do Centro Provincial de Asesoramento Empresarial CPAE 2.0.
Máis en detalle, as actividades terán lugar en Cambados, Lalín, Ponteareas, O Porriño, Pontevedra e Vigo. Estes obradoiros desenvolveranse ao longo de todo o mes de outubro e están encamiñados a preparar os empresarios e as persoas emprendedoras en diversos aspectos das novas ferramentas dixitais que melloren e optimicen o medre e a competitividade dos seus comercios e empresas. Por temáticas, prográmanse obradoiros de dixitalización, almacenamento na nube, comercio virtual, redes sociais, publicidade en Google, mercadotecnia, fotografía para comercio virtual, comercio electrónico, Google Calendar, Hootsuite ou Wordpress.
Os cursos realizaranse no Centro Exposalnés, en Cambados; na aula universitaria da UNED, en Lalín; no centro de desenvolvemento local de Ponteareas; no multicentro do Concello do Porriño; no Edificio Administrativo da Deputación, en Pontevedra; e na sede de Vigo da Deputación.
Todas as persoas interesadas poden consultar as datas dos obradoiros e información de interese na páxina web dos centros CPAE 2.0 ou no correo electrónico info@cpae20.depo.es.