A Deputación de Pontevedra creará unha plataforma única para subir ao ecommerce aos autónomos e PEME da provincia
xoves, 6 de novembro do 2014
- Amancio Varela, xefe do Servizo de Novas Tecnoloxías da Deputación de Pontevedra
A Deputación
de Pontevedra anunciou esta semana o seu obxectivo de crear un Centro
Provincial de Comercio Virtual destinado a pór en xogo unha
plataforma única que permita ás empresas distribuír e vender en
liña produtos propios da provincia. O Centro, destinado sobre todo a
autónomos e microempresas, fará especial fincapé en sectores que o
organismo provincial considera “estratéxicos” para Pontevedra,
como son a alimentación, a restauración, o turismo, o lecer, a
hostalería e a cultura. Polo tanto, a idea é axudar as máis de
64.000 autónomos e microempresas de Pontevedra “a entrar de cheo no
comercio en liña”.
A plataforma, sinala a Deputación, incluirá un
apartado específico dedicado á comarca de Deza, no que terán
presenza as empresas agroalimentarias, de hostalería e de
restauración desta comarca. Segundo engade o organismo que preside
Rafael Louzán, as empresas interesadas en beneficiarse desta
iniciativa poderán adherirse ó servizo dende xa mesmo, e o único
requisito que deben cumprir é estaren domiciliadas e desenvolver a
súa actividade principal na provincia, amais de teren a condición
de microempresas, ou sexa, empresas con 5 ou menos traballadores ou
un balance xeral anual inferior ós 2 millóns de euros.
Isto non quita, engade a Deputación, que non se
poidan beneficiar deste servizo as chamadas “empresas tractoras”,
empresas referentes nos seus sectores que dende logo teñen a
capacidade de “atraer máis empresas e clientes ao Centro de
Comercio Virtual”. Estas firmas deberán ter, asemade, domicilio
social e actividade na provincia. Polo que atinxe ás iniciativas que
se suban ao carro do apartado específico de Deza, poderán facelo
con independencia do seu volume de negocio e número de
traballadores. O Centro de Comercio Virtual contará con servizo
loxístico de seu e cun operador financeiro. Estes recursos
posibilitarán a mellor operatividade posíbel na recollida e na
achega de produtos adquiridos e, tamén, o mantemento dun punto de
venda virtual “que facilite e dea maiores garantías de seguridade
ao pagamento telemático. Con esta finalidade a Administración
provincial publicou as bases que regularán a selección deste
operador loxístico e da entidade financeira que servirá de
plataforma para o pagamento telemático. As entidades financeiras
teñen de prazo ata o 14 de novembro para presentaren as súas
ofertas, mentres que no caso das empresas loxísticas o prazo para a
presentación de propostas remata o día 18.
Engadir que as empresas que decidan adherirse ao
Centro de Comercio Virtual “non só contarán co apoio da
Deputación á hora de integrarse na plataforma senón que disporán
dun servizo de seguimento e control para que poidan facer un uso
correcto da plataforma, amais de achegárselles asesoramento para a
mellor comercialización dos seus produtos”, explica a institución
provincial.