A Deputación de Pontevedra aposta pola formación en TIC en Conectadas 2016
luns, 21 de decembro do 2015
- A presidenta da Deputación de Pontevedra, Carmela Silva
A Deputación
de Pontevedra, a través da súa Xunta de Goberno, vén de aprobar as
bases do programa Conectadas 2016, reformulación dun
programa anterior (Pensa en ti)
e presentado como unha proposta máis e mellor acaida,
en palabras do organismo provincial, “á sociedade do século XXI”.
En detalle, o programa diríxese a impulsar que as mulleres reciban
“unha formación acorde cos tempos actuais” e que participen en
actividades que as “empoderen”. Así, ten como obxectivo
potenciar a participación e promoción das mulleres, favorecer o
intercambio de experiencias en igualdade, impulsar accións
formativas, facilitar o emprego da información e as novas
tecnoloxías “e incorporar de maneira transversal os principios de
igualdade, corresponsabilidade e conciliación da vida persoal,
laboral e familiar”.
As accións formativas, cunha duración de 35 horas,
estarán abertas a toda a poboación da provincia e incluirán o
tratamento da igualdade entre mulleres e homes a través dun módulo
de sensibilización en igualdade de 5 horas de duración. Segundo
sinala a Deputación, as mulleres terán preferencia, reservándose o
25 % das prazas para homes, agás no bloque Súmate ao cambio,
no que a participación pode ser mixta xa que se cubrirán as prazas
ao 50 %.
Como dixemos, a idea do novo goberno do organismo
provincial é achegar bloques de contido “radicalmente diferentes”
aos do anterior executivo a través de Pensa en ti. Así, no
canto de contidos unilaterais sobre artesanía, reparacións e
bricolaxe, cociña, elaboracións artesanais, imaxe persoal ou música
e baile, os de Conectadas 2016 centraranse en cousas como
emprendemento (iniciativas sustentábeis para o emprego, achegándose
formación sobre crear unha empresa e deseñar un plan de negocio,
community manager, comercio electrónico, asesoría laboral
e fiscal e adestramento), cultura (cursos sobre edición de
fotografía, pintura, percusión e canto tradicional, teatro e
animación á lectura e memoria), innovación e novas tecnoloxías (a
través da proposta Actualízate tentarase alfabetizar
dixitalmente as mulleres, do papel ao computador, correo electrónico,
manexo de tableta, teléfono intelixente e redes sociais). O programa
complétase con iniciativas formativas sobre artesanía, xardinería,
alimentación, actividade física ou coidados persoais e saúde.
A iniciativa Conectadas, á que a Deputación
de Pontevedra destina 321.433 € para o 2016, vai dirixida a
asociacións, federacións e fundacións sen ánimo de lucro que
teñan como obxectivo “a promoción das mulleres, que apoien o seu
desenvolvemento e a consecución do obxectivo da igualdade de
mulleres e homes”.