A Deputación de Ourense organiza unha xornada sobre transparencia, bo goberno e eAdministración
mércores, 13 de abril do 2022
O
Centro
Cultural Marcos Valcárcel acollerá o vindeiro 26 de abril unha
xornada sobre Transparencia e bo goberno que profundará
na aplicación destas políticas no ámbito local, na Administración
Electrónica (eAdministración) e na contratación pública. A
actividade vén da man da Deputación de Ourense e a Fundación
Democracia e Goberno Local, de cuxo padroado forma parte a
institución provincial. A xornada, que terá formato matinal, será
inaugurada por Manuel Baltar e o director da fundación, Alfredo
Galán.
A
axenda inclúe presentación do Anuario de Transparencia Local 2021,
coa intervención da Valedora do Pobo de Galicia, María Dolores
Fernández, e director do anuario, Ramón Camp i Batalla.
Sobre
a transparencia na contratación pública e na administración
electrónica falarán os catedráticos de Dereito Administrativo das
universidades de Zaragoza e Oberta de Catalunya, José María Gimeno
e Agustí Cerrillo, respectivamente, mentres que o tamén catedrático
de Ciencia política da Universidade Rey Juan Carlos de Madrid,
Manuel Villoria, abordará as prácticas do bo goberno.
A
última das actividades será unha mesa redonda que analizará as
boas prácticas de transparencia no ámbito local, coa participación
do coordinador do Grupos de Datos Abertos da Federación Española de
Municipios e Provincias (FEMP), Roberto Magro, e o primeiro executivo
da firma SmartGov, actuando como moderador o director da área de
Transparencia da Deputación de Ourense, Fernando Suárez.
Todas
as persoas interesadas en participar nesta xornada poden acceder á
ligazón de Gobiernolocal.org
para formalizar a súa inscrición.
Con
esta cita, a Deputación de Ourense quere reforzar o seu papel como
“institución aberta á cidadanía”, unha liña de traballo da
que abrollou este ano o novo portal de Transparencia da entidade
provincial, un servizo que ten como obxectivo “compartir toda a
información posíbel coa veciñanza, colectivos e entidades”.
Dende
a Deputación lembran que o portal implica o cumprimento, por parte
da institución, de preto do 90 % dos items esixidos pola plataforma
Dyntra -168 de 189- á hora de valorar as boas prácticas de
transparencia e goberno aberto, así como tamén o cumprimento das
obrigas legais e demandas cidadáns nesta materia, o que “permite
manter á Deputación de Ourense desde 2017 a condición de goberno
provincial máis transparente de España”, engaden fontes do ente
provincial.